Diɛt 77 - JAM DE NHIALIC 2011

Luŋdepiɔ̈u në Akööl ke Nuan

¹ Yɛn dhiëëu Nhialic aläl, yɛn dhiau aläl, ago ya piŋ röl.

² Në akööl ke nuan yɛn ee Bɛ̈nydït lɔ̈ŋ, në wɛ̈ɛ̈ric wakɔ̈u yɛn ee yacin yaak nhial ke ya läŋ, ku yɛn cïï luŋ de piɔ̈u ee yök.

³ Të yan Nhialic tak, yɛn ee wëi nhial, ku të waar an löŋde yɛn ee piɔ̈u jiɛth.

⁴ Ee yɛn tɔ yiɛ̈n në wɛ̈ɛ̈ric ëbɛ̈n, yɛn ee diɛɛr aläl arëk abä jam cuö lëu.

⁵ Yɛn ee nïn cï tɛ̈ɛ̈k tak, ku tak run cï lɔ ɣɔn thɛɛr.

⁶ Yɛn ë wɛ̈ɛ̈r thöl ke ya jam piɔ̈n, yɛn ee tak aläl ku thiëëc rɔt an,

⁷ “Bï Bɛ̈nydït wook aa rɛɛc ë ceŋ? Cïï piɔ̈u bï bɛ miɛt ë liŋliŋ ke wook?

⁸ Cï nhiëërdɛn agɔk kɔ̈ɔ̈c aɣet athɛɛr? Cïï gutguutkɛn cï ke lueel, be tɔ̈u tëden?

⁹ Cï Nhialic nɔm määr kekë luöi bï yen piɔ̈u kok? Cï agɔ̈th tëde kokdepiɔ̈nde jɔt?”

¹⁰ Guɔ jɔ lueel an, “Kë rem yapiɔ̈u aläl kï, Nhialic acïï be dhil riɛl.”

¹¹ Bɛ̈nydït yɛn bï göökkuön cï looi tak, yɛn bï kake gäi cï looi ɣɔn thɛɛr bɛ aa tak.

¹² Yɛn bï kakuön cï looi kedhie takiic, yɛn bï ya lui në kadït cï looi kedhie.

¹³ Kajuëc cï ke looi Bɛ̈nydït aɣeerkï yiic, acïn yanh dïït nu cït Yïn.

¹⁴ Yïn ee Nhialic ee kake gäi looi, Yïn cï riɛldu nyuɔɔth ë juööriic.

¹⁵ Në riɛldu Yïn cï kɔcku luök, kuat de Jakop kekë Jothep.

¹⁶ Wään tïŋ ë pïïu Yïn Bɛ̈nydït, acïk bɛ̈n riɔ̈ɔ̈c, ago kol de wɛ̈ɛ̈r lath.

¹⁷ Ago luät tuɛny ë deŋ, ku ye deŋ rel nhial, ku riau wil ë deŋ aguuk kedhie.

¹⁸ Awuɔɔu de reldu ë rɔt lɔ̈ɔ̈r bei, ku nyop wil de deŋ pinynɔm ëbɛ̈n, go piny lath ku nieŋë.

¹⁹ Yïn ee cath në apiöökic, ku tem wɛ̈ɛ̈r thuth, ku të cï käc në Yïcök acïï duëërë tïŋ.

²⁰ Yïn ee kɔcku wat cït man ë tïït, ku nu Mothe kekë Aron në kenïïm.