Diɛt 74 - JAM DE NHIALIC 2011

Lɔ̈ŋ në Biäk bïï Wut Luök

¹ Nhialic, eeŋö nyiëëŋ Yïn wo piny aya? Bä ya gɔ̈th wekë kɔcku aɣet athɛɛr?

² Tak akutnɔmduön wään bä keek lɔ̈c rɔt ɣɔn thɛɛr, kɔckuön awään bä keek bɛ̈ɛ̈i bei ë yaaŋic bïk aa wundu. Tak Yïnɔm në kuur de Dhiɔn wään cï Yïn kɔn ceŋ thïn.

³ Cathë në ee ka cïï riɔ̈ɔ̈k nïïmë ë bɛ̈n, kɔc ke aterda acïk këriëëc ëbɛ̈n riɔ̈ɔ̈k tëɣeric.

⁴ Kɔc ke aterdu ayek awuɔɔu de tiëm looi tëduön ɣeric, acïk beerden tääu ëtɛ̈ɛ̈n, ke bï ya kïn de tiëm.

⁵ Acïtkï kɔc ee yep ë tiim, ee tiim yɛp piny ë yëëpken.

⁶ Acïk tiim cï guaŋ kedhie dhuɔŋ piny, në yëëpken kekë dëi.

⁷ Acïk tëduön ɣeric thuöör piny ku nyopkï në mac, acïk të ye ë Yïn lam thïn riɔ̈ɔ̈k.

⁸ Akɔɔrkï bïk wook riɔ̈ɔ̈r taitai, acïk ɣään ke lɔ̈ŋ nu wutic kedhie nyuɔp piny.

⁹ Kït ke kakuɔn ɣeriic kedhie acïk liu, Acïn tït cï döŋ, ku acïn raan ŋic yen bïï kaam cït ŋö lɛɛr yen ee kënë.

¹⁰ Ee run kadï Bɛ̈nydït yen bïï kɔc ke ater Yïn aa dɔl gup? Bïk rinku ya läät aɣet athɛɛr?

¹¹ Eeŋö reec Yïn luöi bï Yïn wook kony? Eeŋö ee Yïn Yïcin muɔ̈k ciëën në Yïkɔ̈u?

¹² Ku Yïn Nhialic, Yïn ee melikda gɔl të ɣɔn ciɛkë käŋ, Yïn cï wook luök raan juëc.

¹³ Në riɛlduöndït Yïn cï wɛ̈ɛ̈r tekic, ku dhiac ŋuäl nïïm piny ë pïïuwiic.

¹⁴ Yïn cï nɔm de ŋuäl dïït nu wïïr dhiac aya, ku tɔ guöpde ciɛm ë läi ke jɔ̈ɔ̈ric.

¹⁵ Yïn cï nyïïn ku liil tɔ de yic kuëër, ku tɔ kiɛɛrdït ril.

¹⁶ Yïn cï aköl kekë wakɔ̈u cak, ku tääuwë akɔ̈l kekë pɛɛi ë ɣäänken yiic,

¹⁷ ku Yïn cï akɛɛth ke piny kiëët, ku loi mɔ̈i kekë rut.

¹⁸ Ku ŋic Bɛ̈nydït, nɔn ye kɔc ke aterdu Yïn dɔl guöp, nɔn cïn kek nïïm Nhialic ku yek Yïn biɔɔn guöp.

¹⁹ Du kɔckuön cïn nïïm riɛl nyiëëŋ ë kɔc ke ater cït läi roor cin, du nɔm mär në kɔckuön yɔŋ keek!

²⁰ Tak löŋduön cï mac wekë wook. Ade akuöörkuöör thiäŋ aguuk col ke wut kedhie.

²¹ Du kɔc yɔŋ keek bï tɔ yäär, tɔ kɔc kuanynyïïn ku kɔc cïn käŋ lec Yïn.

²² Jɔt rɔt Nhialic ku kony löŋdu! Tak Yïnɔm kɔc kuc Nhialic ayek yïn dɔl guöp aköölnyïïn.

²³ Du nɔm mär në awuɔɔu de kɔc ke aterdu, awuɔɔu ye kɔc ke aterdu looi aköölnyïïn.