Diɛt 73 - JAM DE NHIALIC 2011

Awerek de Diäk ( Diɛt 73–89 ) Yic de Nhialic

¹ Ee yic Nhialic apiɛth kekë Yithriɛl, kɔc lɔ piɔ̈ɔ̈th wai.

² Ku yɛn cï piɔ̈u duëër bäp, gämdï acï duëër jäl,

³ në luöi cï tiɛɛl ya dɔm në biäk de kɔc ee röt lɛɛc, wën tiëŋ ɛn pïïr ke piɛth ke kɔc ee karɛc looi.

⁴ Acïn arɛɛm ee keek yök, keek arilkï ku apiɛthkï gup.

⁵ Acïkï ee nuan cït man de kɔc kɔ̈k, acïnkï nïïm nuɛɛn cït man ye kɔc kɔ̈k nuan.

⁶ Ka ayek lɛc cieŋ cït guën ë yeth, ku ceŋkï akuöörkuöör cï lupɔ.

⁷ Ayek karɛc wäl piny në kepiɔ̈ɔ̈th, ku yek karɛc tak ë kenïïm ceŋ.

⁸ Ayek kɔc kɔ̈k dɔl gup, ku yek karɛc lueel, Keek adekï gup lɛc, ku yek kiɛɛr bï kek kɔc kɔ̈k yɔŋ looi.

⁹ Ayek karɛc luɛɛl ë Nhialic guöp paannhial, ku yek wël ke lɛc gäm kɔc ke pinynɔm,

¹⁰ në biäk de ee kënë kɔc ke Nhialic ayek röt puk ku leckï keek, ku yek kɔɔr bïk këdɛn yek lueel gam.

¹¹ Ayek lueel an, “Acïï Nhialic bï ŋic, acïï Nhialic Awärjäŋ bï yökic.”

¹² Yen täu tɛ̈u ë kɔc rac ka. Adekï nïïm kajuëc, ku ayek kajuëc yök aköölnyïïn.

¹³ Ee kë cïn naamde luöi cän rɔt muk ke ye ë lipëlip! Ku kën kërac looi!

¹⁴ Nhialic Yïn cï yɛn tɔ nuan të bääric, të ruu ë piny aköölnyïïn, ke Yï dui yɛn.

¹⁵ Na ë ya cï kë cït ë kënë lueel, yɛn cïï duëër lui cït man ë raan töŋ de kɔcku.

¹⁶ Acä them nɔn bän agönhdu takkic, go yic bɛ̈n riɛl tëde yɛn,

¹⁷ arëk abä lɔ tëɣeric de Nhialic. Aguɔ jɔ yökic yen kë bï tuöl tëde kɔc rac.

¹⁸ Abä keek tääu ë tuŋthok, ku tɔ keek lööny ë riääkic.

¹⁹ Abï keek guɔ riɔ̈ɔ̈k ëthiäu, ku lekkï piny tëde kɔc cï thou.

²⁰ Acïtkï nyuöth ee jäl të cïï ë raan pääc, ayek määr Bɛ̈nydït të jɔt ë raan rɔt.

²¹ Wään cän piɔ̈u jiɛth ku tuöc piɔ̈u wokë täk.

²² Yɛn aa cï dhɔ̈n cït man ë läi, yɛn kën jamdu yök yic.

²³ Ku ŋuɔɔt ke ya rɛ̈ɛ̈r ke ya thiääk wokë Yïn, ku Yïn ee yɛn muk ciin.

²⁴ Yïn ee yɛn wat në wëëtdu, ku miäk wadäŋ Yïn bï yɛn loor nɔm në dhuëëŋ.

²⁵ Eeŋö däŋ pei nu tëde yɛn paannhial, cie Yïn? Ku acïn këdäŋ pei duɛ̈ɛ̈r bɛ kɔɔr në pinynɔm, të cïn Yïn.

²⁶ Nɔmdï, kekë guöpdï aduëërkï kɔ̈c, ku Nhialic ee riɛldï, ee yen ya kɔɔr aläl.

²⁷ Kɔc ee Yïn nyääŋ piny abïk thou ë yic, Yïn bï kɔc cïn adöt tëde Yïn riɔ̈ɔ̈k.

²⁸ Ku në biäkdï ee këpiɛth aläl bä thiääk wo Nhialic, Bä kuɔɔny aa yök tëde Bɛ̈nydït Nhialic, ku bä kakɛn cï looi ëbɛ̈n luɛɛl!