Diɛt 72 - JAM DE NHIALIC 2011

Lɔ̈ŋ në Biäk de Melik

¹ Gämë melik yicdu Nhialic, ku gämë piathëpiɔ̈ndu wënduön bɛ̈ny.

² Ago kɔcku muk në piathëpiɔ̈u ku muk kɔc yɔŋ keek në yic.

³ Tɔ piny yök kuɛth në biäk de kɔc, ku tɔ yök piathëpiɔ̈u.

⁴ Melik ë luel löŋ de kɔc kuanynyïïn në yic, tɔ kony kɔc kuanynyïïn, ku tɔ tiam kɔc ee keek yɔŋ.

⁵ Tɔ kɔcku lam Yïn, në akööl yiic ëbɛ̈n, ayï pɛ̈i yiic ëbɛ̈n, aɣet cï run bï bɛ bɛ̈n ëbɛ̈n.

⁶ Tɔ melik cït deŋ tueny ë duumiic, ku cït nyieer ee lööny piny.

⁷ Tɔ piathëpiɔ̈u dït në akööl ke pïïrde yiic ku tɔ kuɛth tɔ̈u në pɛ̈i yiic ëbɛ̈n.

⁸ Ciɛɛŋde abïï gɔl në wɛ̈ɛ̈r leer ë wɛ̈ɛ̈r däŋë, ku gɔl ë Yuparat leer ë piny thar.

⁹ Kɔc ke jɔ̈ɔ̈ric abïk kenïïm guöt piny në yenɔm, kɔc ke aterde abïk röt cuat piny në yenɔm.

¹⁰ Meliik ke Tarcic kekë meliik ke tuöör, abïk miɔɔc në miɔ̈c, meliik ke Ceba kekë Theba, abïk yen yiɛ̈n miɔ̈c.

¹¹ Meliik kedhie abïk kenïïm guöt piny në yenɔm, juöör ëbɛ̈n abïk yen aa luööi.

¹² Ee kɔc kuanynyïïn ee yen cɔɔl luök, kekë kɔc cïn käŋ kɔc ye rɛɛc.

¹³ Ee piɔ̈u kok kekë kɔc kɔ̈c ku kɔc kuanynyïïn, ee kɔc cïn käŋ kony wëi.

¹⁴ Ee keek luök në yaaŋ kekë akuöörkuöör, wëiken ayek dikëdik tëde yen.

¹⁵ Yïn bï pïïr athɛɛr melik! Tɔ gëmë adhäm de Ceba, abï ya gäm lɔ̈ŋ aköölnyïïn ëbɛ̈n, ku athiɛɛi de Nhialic abï ya täu kekë yen aɣet athɛɛr!

¹⁶ Tɔ pinynɔm de rɛɛp juëc ëbɛ̈n, tɔ kur nïïm thiäŋ në rap, ku bïk juëc në luɔk cït ka nu ë Lebanɔn. Tɔ pɛ̈ɛ̈nydït thiäŋ yiic në kɔc juëc cït man ë duum thiäŋ yiic në wal.

¹⁷ Në rin ke melik ë ke cïï mär ë kɔc nïïm, tɔ lɛcde tɔ̈u në täu tɛ̈u ë akɔ̈l. Tɔ juöör ëbɛ̈n thiëëc Nhialic bïï keek thieei, cït man cïï yen melik thieei, ku tɔ ke köör yen miɛtëpiɔ̈u.

¹⁸ Pianykï Bɛ̈nydït, Nhialic de Yithriɛl! Ee Yen Yetök Yen ë kake gäiyë looi.

¹⁹ Pianykï rinkɛn ke dhuëëŋ aɣet athɛɛr! Në dhuëëŋde thiɔ̈ŋ pinynɔm ëbɛ̈n. Amiin! Amiin!

²⁰ Kënë ee thök de lɔ̈ŋ de Debid wën de Jethe.