Diɛt 71 - JAM DE NHIALIC 2011

Lɔ̈ŋ de Monydït

¹ Bɛ̈nydït yɛn cï bɛ̈n të nu Yïn, bä ya bɛ̈n tiit, du yɛn tɔ tiam taitai.

² Në baŋ de piathëpiɔ̈ndu, luäk ɛn ku luönyë ë ya bei. Piŋ lɔ̈ŋdï ku kony yɛn.

³ Tɔ rɔt ee kuurdiën de luäk, ku gëlgël ril. Yïn ee gëlgëldï ku konydï.

⁴ Nhialicdï kony yɛn në kɔc rac, kony ɛn në baŋ ë riɛl de kɔc ee karɛc looi.

⁵ Nhialic, yɛn cï aŋäthdï tääu në Yïciin. Yïn aa ya ŋɔ̈ɔ̈th ɣɔn ŋuɔɔt ɛn ke ya ye dhuk.

⁶ Yɛn cï rɔt kan në Yïn në pïïrdï yic ëbɛ̈n, Yïn cï ya kony, gɔl ë kööl ë dhiëëth ë yɛn. Yïn bä ya leec aköölnyïïn.

⁷ Ciɛɛŋdï aye kääŋ tëde kɔc juëc, në luöi ee Yïn konydiën ril.

⁸ Akööl yiic kedhie Yïn aa leec, ku guiɛɛr dhuëëŋdu.

⁹ Du ya reec ënɔɔnë ë luöi cän dhiɔp, du ya reec ënɔɔnë ë luöi cän kɔ̈c.

¹⁰ Kɔc ke aterdï akɔɔrkï bïk ya nɔ̈k, ayek jam ku kïïtkï luöi bïk kek a nyiɛɛn.

¹¹ Ayek lueel an, “Nhialic acï ya nyääŋ piny, lokku në yecök ku dɔmku, acïn raan bï ye luök.”

¹² Nhialic du rɛ̈ɛ̈r tëmec we yɛn, Nhialicdï bäär dap ya kony!

¹³ Kɔc ee ya mak ë ke tiam ke ku riäär ke. Kɔc kɔɔr bïk ya yiëk guöp bɔ̈t, ë ke yäär ku riɔ̈ckï gup.

¹⁴ Yɛn bï aŋäthdï tääu në Yï guöp ëceŋ. Yïn bä leec aläl.

¹⁵ Yɛn bï jam në biäk de läkdu. Aköölnyïïn kedhie yɛn bï ya jam në biäk de kuɔɔnydu, cakaa nɔn dïït ë yöŋ de yen yic.

¹⁶ Yɛn bï lɔ në riɛl de Bɛ̈nydït Nhialic, ee Yïn Yïtök, Yïn abän piathëpiɔ̈ndu aa leec.

¹⁷ Yïn cï ya wɛ̈ɛ̈t ɣɔn ŋuɔɔt ɛn ke ya ye dhuk, ku yɛn ŋoot ke ya lueel kakuön ke gäi.

¹⁸ Ënɔɔnë yɛn cï dhiɔp ku yɛn cï nɔm lou, du ya nyiëëŋ piny Nhialic! Rɛ̈ɛ̈rë we yɛn të luɛɛl ɛn riɛldu kekë dhuëëŋdu, lëk rɛm bï lɔ̈ɔ̈k bɛ̈n kedhie.

¹⁹ Piathëpiɔ̈ndu Nhialic, ee ɣet nhial. Yïn cï kadït looi, acïn raan töŋ cït Yïn.

²⁰ Yïn cï nuɛɛn ku tɔ̈ɔ̈k yiɛ̈n yɛn, ku Yïn bï riɛldï bɛ bɛ̈ɛ̈i, Yïn bï yɛn pɛ̈n lɔ rɛɛŋ.

²¹ Yïn bï yɛn tɔ ril anandï, Yïn bï yɛn be duut piɔ̈u.

²² Yïn bä leec në thom, yɛn bï piɔ̈nduön adöt piɔɔny Nhialicdï. Yïn bä kiët diɛt në thomdï, Yïn Nhialic Ɣeric de Yithriɛl.

²³ Yɛn bï kïïu në miɛtëpiɔ̈u, ke ya cɔ̈ŋ, në guöpdï ëbɛ̈n yɛn bï ket, në luöi cï Yïn yɛn kony.

²⁴ Yɛn bï aa jam në piathëpiɔ̈ndu ë aköölnyïïn ëbɛ̈n, në biäk cïï e kɔc kɔɔr bïk ya yiëk guöp buɔ̈t tɔ yäär ku tɔ keek riɔ̈c gup.