Diɛt 7 - JAM DE NHIALIC 2011

Lɔ̈ŋ në Biäk de Yic

¹ Bɛ̈nydït Nhialinydï, yɛn ë bɛ̈n tëde Yïn bä ya bɛ̈n gël, kony yɛn, ku luäk ɛn në kɔc cop ɛn,

² na cie yen ka bïk ɛn rɛtic cït man ë köör, ku thimkï ya në thïïm ku acïn raan däŋ bï ya luök.

^3-4 Bɛ̈nydït Nhialicdï, na de kë cä wööc, na de kërɛɛc cä luöi raan ŋïc wok rëër, ku nɔn cän kake raan de wok ater peec në kë cie yic, na de kë cä looi në ee kake yiic,

⁵ ke Yï tɔ ya kuɛny ë kɔc de aterdï cök, ku tɔ ke gïth ɛn, ku tɔ ke dɔm ɛn, ku näkkï yɛn, ku nyiëëŋkï ya piny ke ya cï thou!

⁶ Yïn Bɛ̈nydït jɔt rɔt! Kääcë nhial ke Yï cï gɔ̈th, ku riäk tuöc ë piɔ̈u de kɔc ke aterdï, Jɔt rɔt ku kony ɛn, Ee yic yen ye kɔɔr,

⁷ tɔ amatnɔm de kɔc guëër ë Yïnɔm, ku jɔ nyuc në thöönydu nɔm, ke Yïn nu nhial.

⁸ Yïn aye Bɛ̈ny de luk nu ë kɔc nïïm kedhie. Gämë yɛn piathëpiɔ̈u Bɛ̈nydït, aŋic nɔn ciɛ̈n ɛn guöp awäc.

⁹ Yïn ee Nhialic Piɛthpiɔ̈u, ku ye täŋda ku këde piɔ̈nda them. Tɔ luɔi de kɔc ee kërac looi kääc, ku cuöötë kɔc ee kapiɛth looi.

¹⁰ Nhialic Yen aye köndï, Ee Yen ee kɔc lɔ piɔ̈ɔ̈th wai luök.

¹¹ Nhialic, Yen aye bɛ̈ny de luŋ yic, ku ee kɔc rac yiëk yiëth gääk ë cieŋ.

¹² Të kën kek ciɛɛŋden waar, Nhialic abï abätäude cuɔth thok. Ku abï dhɛ̈ŋke tiööt ku kïït ke,

¹³ abï tɔɔŋkɛn ke nääk nööm, ku wël wiɛth dɛ̈p thook kɔc.

¹⁴ Tïŋ luɔi ye kɔc rac, kërac tak, ayek nuɛɛn kiëët, ku loikï lueth.

¹⁵ Ku abï wïn man ë deep kek kɔc, keek aa dɔm gup.

¹⁶ Ku abïï kërɛɛcdɛn yek looi keek aa luöi këtuc. Ku abïk bɔ̈t aa yök në biäk de akuöörkuöörden.

¹⁷ Yɛn bï Bɛ̈nydït gäm alɛɛc rɔ̈ŋ ke piathëpiɔ̈nde, ku yɛn bï Bɛ̈nydït Awärjäŋ leec në diɛt.