Diɛt 69 - JAM DE NHIALIC 2011

Dhiën Kɔɔrë Kuɔɔny

¹ Nhialic kony yɛn! Pïïu acïk ɣëët në ya yeth,

² Yɛn muɔu në booric, ku acïn të ril nu, yɛn cï bɛ̈n ë pïïu thuth yiic, ku apiöök akɔɔr bï ya mou.

³ Yɛn cï bäp në cɔ̈t kaar en kuɔɔny, ka röldï arem. Nyïïnkï acïk tuööp, ke ya kɔɔr kuɔɔny tëde Nhialic.

⁴ Kɔc man yɛn, ke cïn kë cä looi, kuënden ajuëc aläl awärkï nhïm ke yanɔm. Kɔc ke aterdï ayek a mak në lueth, Keek arilkï, ku akɔɔrkï bïk ya nɔ̈k. Acïk ya tɔ col ka kën ke kual.

⁵ Nhialic, karɛckï, akënë ke thiaan ee Yïnyin, Yïn ŋic dhɔ̈ɔ̈n cän dhɔ̈n.

⁶ Du kɔc ee Yïn ŋɔ̈ɔ̈th tɔ yäär në biäkdï, Bɛ̈nydït Nhialic Awärjäŋ! Du kɔc ee Yïn lam tɔ yäär gup në biäkdï, Nhialic de Yithriɛl!

⁷ Ee biäkdu yen aye ë yɛn läät ku yen acï ë ya kum në ayäär.

⁸ Yɛn cï ciët alei tëde mïthëkɔckï, ku ciët jurdäŋ baaida.

⁹ Ŋeenydï në biäk ë ɣöndu adɛ̈p ë ya yäc cït mac, lɛ̈ɛ̈t lɛ̈ɛ̈t ë kɔc Yïn ee lööny në yakɔ̈u.

¹⁰ Yɛn cï rɔt kuɔɔr piny në reec de cäm, go kɔc ya läät,

¹¹ Yɛn cï lupɔɔ ke dhiëëu tääu në yakɔ̈u, gokï ya dɔl guöp.

¹² Ayek ya jääm guöp në kuɛɛriic, ku kɔc ee wiɛɛt acïk ya cäk ë diɛt.

¹³ Ku në biäkdï, Bɛ̈nydït, ee Yïn bä ya lɔ̈ŋ, gam lɔ̈ŋdï Nhialic, në köölduön cï lɔc. Bɛ̈ɛ̈rë lɔ̈ŋdï në biäk de nhiëërduön agɔk, në biäk ee Yïn gutguutduön de kuɔɔny döt.

¹⁴ Luäk ɛn ë mou në tiɔpic, muk ɛn aril në biäk de kɔc ke aterdï, luäk ɛn në pïïu thuth yiic.

¹⁵ Du amool tɔ kum yanɔm piny, du yɛn tɔ mɔu tëthuth, ayï thon bän lɔ në raŋic.

¹⁶ Bɛ̈ɛ̈rë lɔ̈ŋdï Bɛ̈nydït, në piath de nhiëërduön agɔk, në biäk de dït de kokdepiɔ̈ndu, Pɔ̈kë rɔt ɛn!

¹⁷ Du rɔt thiaan në awundu, yɛn nu në nuandïtic, luäk ɛn ënɔɔnë!

¹⁸ Bäär të nu yɛn ku kony ɛn, luäk ɛn tëde kɔc ke aterdï.

¹⁹ Yïn ŋic luöi cï ya läät, ku luöi cï ya yɔ̈ɔ̈r guöp, ku biön cï ya biɔɔn, Yïn woi kɔc ke aterdï kedhie.

²⁰ Lɛ̈ɛ̈t acïk ya dhoŋ piɔ̈u, ku yɛn cï piɔ̈u jiɛth. Yɛn aa ŋäth kokdepiɔ̈u, go ciën tök, ku kaar duötdepiɔ̈u, go ciën kë yäk.

²¹ Wään de yɛn guöp cɔk, gokï ya gäm wurïï, wään de yɛn guöp rou, gokï ya gäm kuɔɔt.

²² Tɔ dhuëëŋden yïn keek riääk, tɔ dhuëëŋ yaathden ee kë tɔ keek löny.

²³ Bɛ̈nydït tɔ keek cɔɔr! Tɔ keek rem kɔ̈ɔ̈th ëceŋ!

²⁴ Wälë agönhdu në kekɔ̈ɔ̈th, tɔ agönhduön dït löny keek.

²⁵ Tɔ tëdɛn cieŋkï nyiëëŋ ë piny, ë cïn raan töŋ dɔ̈ŋ ke pïïr në paanyden yic.

²⁶ Ayek kɔc cï luöi këtuc yɔŋ, ayek jam në biäk bïï kek, kɔc cï yiëk gup bɔ̈ɔ̈t yɔŋ.

²⁷ Muk kuën de karɛcken kedhie, du keek tɔ de nïïm këdäŋ në kuɔɔnydu yic.

²⁸ Tɔ rinken cuthë bei në awerek de pïïric, tɔ ke nyiɛɛiyë rin në kuën de kɔc piɛthpiɔ̈ɔ̈th yiic.

²⁹ Ku yɛn nu në arɛɛmic kekë jiɛthëpiɔ̈u, Nhialic, jatë ya nhial, ku kony yɛn.

³⁰ Yɛn bï Nhialic piɔɔny në dit, Yɛn bï dïtde lɛ̈k thieithieei.

³¹ Kënë abï Bɛ̈nydït miëtpiɔ̈u, awär luöi bïï ë Yen näk ɣɔ̈k, ayï luöi bïï ë Ye näk miöör dït.

³² Të lee ë kɔc yɔŋ ee kënë tïŋ, abïk piɔ̈ɔ̈th miɛt, kɔc ee Nhialic lam abïï ke riit piɔ̈ɔ̈th.

³³ Bɛ̈nydït ee kɔc nuan piŋ röt, ku acïï nɔm ee määr në kɔckɛn cï mac.

³⁴ Lɛckï Nhialic, wek paannhial kekë piny, ku wɛ̈ɛ̈r kekë ka nu në keyiic kedhie.

³⁵ Yen abï Dhiɔn luök, ku abï pɛ̈ɛ̈nydït ke Juda bɛ yïk. Kɔcke abïk rɛ̈ɛ̈r ëtɛ̈ɛ̈n ku nömkï piny,

³⁶ abïï kuat de awuutke lɔ̈ɔ̈k lak, ku kɔc nhiaar Yen abïk rɛ̈ɛ̈r ëtɛ̈ɛ̈n.