Diɛt 68 - JAM DE NHIALIC 2011

Din ë Tiëm de Wut

¹ Nhialic ë rɔt jɔt ku thëi kɔckɛn ke ater piny. Kɔc man En ayek kat ke ke cï tiaam.

² Cït man ye ë tol kuɔɔth wei, Yen aye Yïn keek cuɔp wei. Cït man ye kɔl lɛ̈ɛ̈ŋ në mac nɔm, yen ee tän bï kɔc ee karɛc looi riäär në Nhialic nɔm.

³ Ku kɔc piɛthpiɔ̈ɔ̈th abïk piɔ̈ɔ̈th miɛt, ku abïk dɔl ë Nhialic nɔm, abïk piɔ̈ɔ̈th miɛt, ku mockï kiɛɛu ë miɛtëpiɔ̈u.

⁴ Kɛ̈tkï diɛt Nhialic, kɛ̈tkï diɛt piaany wek rinke, kiëëtkï kueer në biäkde, Yen Raan cath ë luäät kɔ̈u. Rinke acɔlke Bɛ̈nydït, yak piɔ̈ɔ̈th miɛt në Yenɔm!

⁵ Wun mïth abɛɛr ku raan ee diëër abɛɛr gël, ee Nhialic ee rɛ̈ɛ̈r tëdɛn ɣeric,

⁶ Ee raan rɛ̈ɛ̈r Yetök gäm baai bïï cieŋ, ku tɔ kɔc cï mac lony ku tɔ ke kueth, ku kɔc ee Nhialic rɛɛc, abïk rëër ë jɔ̈ɔ̈ric.

⁷ Nhialic, të wɛt Yïn kɔcku, ke Yï tëk ë jɔ̈ɔ̈ric,

⁸ Piny aye lath, ku të nhial ee deŋ luööŋ piny, në biäk de bɛ̈n ë Nhialic de Thinai. Go kuur ë Thinai lath në Nhialic nɔm, Nhialic de Yithriɛl.

⁹ Yïn ee deŋ tɔ tueny youyou, ku tɔ pinyduön ë cï yal dëk,

¹⁰ kɔcku acïk ɣöötken yïk ëtɛ̈ɛ̈n, në piathdu Yïn ë kɔc kuanynyïïn miɔɔc.

¹¹ Të cïï Bɛ̈nydït löŋ tääu piny, diëër juëc ayek thok lɔ luɛɛl:

¹² “Meliik ku remdɛn de tɔŋ akɔtkï! Diäär nu ë bɛ̈i yiic ayek ka cï peec tɛ̈k röt:

¹³ Ku kɔc lɔ döŋ ciëën ke ke tit amɛ̈l, abïï ke gäm wuök ke guuk cï kum kɔ̈u në ateek, ku nɔɔk cï lɔ bilbil në adhäm lɔ kïr.

¹⁴ Wään bïï ë Nhialic Awärjäŋ meliik thiäi piny në kuur ë Dhalmon nɔm, acï deŋ ë kɔɔi bɛ̈n tɔ tueny.

¹⁵ Kuurdïït ë Bacan! Kuur de Bacan de nɔm awiɛn juëc!

¹⁶ Eeŋö ya wek kuur cïï Nhialic lɔc bïï Yen rɛ̈ɛ̈r thïn woi në abiaan, wek kur dït de nïïm awiɛn? Bɛ̈nydït abï rɛ̈ɛ̈r ëtɛ̈ɛ̈n aɣet athɛɛr!

¹⁷ Në aguumkɛn juëc ke abëël ke tɔŋ, Bɛ̈nydït aa bɔ̈ në Thinai, abɔ̈ tëɣeric.

¹⁸ Yïn cï lɔ nhial në kuur bäär nɔm ya, ku jɔt kɔc juëc cï peec ku gam miɔ̈c tëde keek, ayï kɔc reec Yïn. Bɛ̈nydït Nhialic abï rɛ̈ɛ̈r ëtɛ̈ɛ̈n.

¹⁹ Pianykï Bɛ̈nydït, Raan ee wook ɣääc në aköölnyïïn ëbɛ̈n Nhialic ee konydan ë wëi.

²⁰ Nhialicda ee Nhialic de kuny de wëi, ku Bɛ̈nydït ee Bɛ̈nydïïtda, raan ë kony wook në thuɔɔuwic.

²¹ Nhialic ë yic abï kɔc de ater në Yen, dhuööŋ nïïm, kɔc ee rɛ̈ɛ̈r në ciɛɛŋ rɛɛcden yic.

²² Acï Bɛ̈nydït lueel an, “Yɛn bï kɔc ke aterdu bɛ̈ɛ̈i ciëën në Bacan, abä ke bɛ̈ɛ̈i bei në Abäpdit thar piny të thuth,

²³ aguɔkï we cök waak në riɛmden yic, ku jɔ jökkun biäk de rim ke kɔc ke ater lap.

²⁴ Nhialic, cäthduön ë tiëm acï tïŋ ë raan ëbɛ̈n, cäth ciɛth ë Nhialic meliŋdï ke lɔ tëɣeric.

²⁵ Kɔc ee kët anukï tueŋ, ku kɔc gut thom anukï ciëën, ku diäär kor anukï ë ciɛɛlic ke ke koth aruöör.

²⁶ “Nhialic abäk thieei në akutnɔmde yic pianykï Bɛ̈nydït, wek kuat de Jakop!

²⁷ Benjamin ee bɛ̈n tueŋ, dhiën koor aläl, ku jɔ bäny ke Juda lɔ në kuutken, ku jɔ ke kuany cök në bäny ke Dhebulun kekë Naptali.

²⁸ Nhialic, nyuɔɔthë riɛldu, riɛlduön wään cï looi ë biäkda wook,

²⁹ në baŋ de luaŋduön nu ë Jeruthalem, të ye meliik Yïn yiɛ̈n miɔ̈c.

³⁰ Ŋɛ̈nyë Rip, yen län roor cï thiaan aguötic, ŋɛ̈nyë juöör ril cït miöör cï miɔ̈l, agut të bï kek kenïïm guöt piny ku miɔckï Yïn në ateekken. Thiäiyë kɔc nhiaar tɔŋ piny.

³¹ Abï kɔc ke Rip yɔ̈ɔ̈k bïk miɔ̈c de maläŋ bɛ̈ɛ̈i, ku kɔc ke Kuc abïk kecin täär Nhialic ke ke läŋ.

³² Pianykï Nhialic, wek ciɛɛŋ ke pinynɔm. Pianykï Bɛ̈nydït në diɛt,

³³ Yen Raan cath ë paannhial kɔ̈u, paannhial thɛɛr. Piɛŋkï rölde, röldɛn dït.

³⁴ Luɛɛlkï riɛl ë Nhialic, dhuëëŋde anu në Yithriɛl nɔm, ku riɛlde anu paannhial.

³⁵ Nhialic arïïuwë të bïï yen tëɣeric, Nhialic de Yithriɛl! Ee riɛl ku dït gäm kɔcke. Pianykï Nhialic!