Diɛt 66 - JAM DE NHIALIC 2011

Din ë Piɔ̈ny ku Alɛɛc

¹ Pianykï Nhialic në awuɔɔu de miɛtëpiɔ̈u wek pinynɔm ëbɛ̈n!

² Kɛ̈tkï dhuëëŋ de rinke, gämkï lɛc në dhuëëŋ!

³ Lëkë Nhialic an, “Luɔɔidu ee këdïït ë gäi! Riɛldu adït aläl ee kɔc ke aterdu tɔ gut kenïïm piny në Yïnɔm, në riɔ̈ɔ̈c.

⁴ Pinynɔm ëbɛ̈n alam Yïn, ayek Yïn kɛ̈t diɛt ke piɔ̈ny, ayek rinku piɔɔny në diɛt.”

⁵ Bäär tïŋ kë cï Nhialic looi, kadït ke gäi cï luöi kɔc.

⁶ Acï wɛ̈ɛ̈r puk tɔ ye të ril, ku tem kuarkuɔ kiir në kecök. Wok ee piɔ̈ɔ̈th miɛt ëtɛ̈ɛ̈n në biäk de kë cï looi.

⁷ Ee pinynɔm mac në riɛlde aɣet athɛɛr, ku ye nyïïnke juöör woi. Tɔ cïn raan be rɔt jɔt, raan reec en.

⁸ Nhialicda abäk thieei, wek juöör ëbɛ̈n, takkï lɛcdun piŋ.

⁹ Acï wook mɔ̈k në kɔc pïïr yiic, ku akën wook tɔ wiɛ̈ɛ̈k.

¹⁰ Nhialic, Yïn cï wo tääu në thëmic, cït man ye ateek lëëŋ në mac yen luöi cï Yïn wo them ka.

¹¹ Yïn cï wo tɔ lööny në wïn ë dɛ̈pic, ku tääuwë këdïït thiek në wo yiëth.

¹² Yïn cï kɔc ke aterda, tɔ dum wook, wok cï tëëk në macic kekë amool, ku ënɔɔnë Yïn cï wo bɛ̈ɛ̈i tëde kuɔɔny.

¹³ Yɛn bï miɔ̈c ye nyop ëbɛ̈n bɛ̈ɛ̈i ɣöndu Yïn bä gäm kë cän gutguut lueel.

¹⁴ Kë cä lueel në Yaliep kë cä than në yathok wään nuö yɛn në nuan yic.

¹⁵ Yɛn bï amɛ̈l ke miɔ̈c ye nyop ëbɛ̈n gam në yïk nɔm Yïn bä näk miöör ku thök bɔɔth, ku tol abï lɔ nhial.

¹⁶ Bäk piëŋkï, wek kɔc ee Nhialic dhuëëŋ guöp, ku wek bä lëk kë cï luöi yɛn.

¹⁷ Acä mɔ̈c kiɛɛu bï ya kony, ku piaany në diɛt.

¹⁸ Na ë ya cï awänydï mɔ̈k ë yapiɔ̈u, adï kën Nhialic ya piŋ röl.

¹⁹ Ku ë yic Nhialic ë ya piŋ röl, acï lɔ̈ŋdï piŋ.

²⁰ Yɛn piɔny Nhialic, në luöi kën En lɔ̈ŋdï rɛɛc, ku akën Nhiëërdɛn agɔk nyaai tëde yɛn.