Diɛt 65 - JAM DE NHIALIC 2011

Piɔ̈ny ku Alɛɛc

¹ Nhialic ee yic, Yïn buk aa leec në Dhiɔn, ku dötku gutguut cuk lueel an buk luöi Yïn,

² në luɔi ee Yïn lɔ̈ŋ bɛ̈ɛ̈r, kɔc ke pinynɔm ëbɛ̈n ayek bɛ̈n të nu Yïn thïn,

³ në biäk de karɛcken. Karɛckuɔ ayek wo tiaam, ku aye keek päl wook.

⁴ Thieithieei në kɔc cï keek lɔc, kɔc cï keek bɛ̈ɛ̈i bïk rɛ̈ɛ̈r ɣöndu. Wo bï kuɛth në kapiɛth tɔ̈u ɣöndu, athiɛɛi de ka nu luaŋduön ɣeric.

⁵ Yïn ee këda bɛ̈ɛ̈r në miɔ̈c Yïn wo tɔ tiëm, ku Yïn ë kadït ke gäi looi, bï Yïn ke wo kony. Kɔc nu ë piny thar ku ka nu wɛ̈ɛ̈r lɔŋtui aŋäthkï Yïn.

⁶ Yïn cï kur tääu tëden në riɛldu, nyooth Yïn riɛlduön dït.

⁷ Yïn cï awuɔɔu de pïïu miɛɛm, ku miɛɛmë awuɔɔu de apiöök, ku Yïn ee awuɔɔu de kɔc tɔ kääc.

⁸ Pinynɔm ëbɛ̈n ë kɔ̈ɔ̈c në riɔ̈ɔ̈c, në biäk de këduön cï looi, kakuön cï looi ayek awuɔɔu de miɛt ë piɔ̈u bɛ̈ɛ̈i në piny thar biäkkë leer ë biäkdäŋë.

⁹ Yïn ë dön döt Yïn piny nyuɔɔth në luöi Yïn deŋ tuɔɔc, Yïn ee pinynɔm tɔ kueth ku tɔ wäi. Yïn ë nyïïn tɔ de yic pïïu, ku miɔc piny në kɔ̈th, yen luɔi Yïn e looi kï.

¹⁰ Yïn ee deŋ youyou tuɔɔc në duum cï gɔ̈i yiic, ku tɔ ke bɔ̈ɔ̈t në pïïu, ku tɔ tiɔp ɣäi në nyieer, ku tɔ wal thii cil.

¹¹ Yïn ee kajuëc cï luɔk gäm wook ëbɛ̈n, ku të cï Yïn lɔ thïn ee dɛ kajuëc.

¹² Ɣään ke nyuäth ë jɔ̈ɔ̈ric acïk thiäŋ ë ɣɔ̈k, ku thiäŋ kur nïïm në miɛtëpiɔ̈u.

¹³ Roor ë nyuäth acï thiäŋ ke luuny ke thök, ku wɛ̈k acïk thiäŋ ë rap, kɔc kedhie ayek kiɛɛu de miɛtëpiɔ̈u moc ku kitkï diɛt.