Diɛt 63 - JAM DE NHIALIC 2011

Kɔ̈ɔ̈r ë Nhialic

¹ Nhialic, Yïn ee Nhialicdï, Yïn kaar. Guöpdï ëbɛ̈n akɔɔr Yïn, yɛn cï yal në Yïn cït man ë piny ril cïn yic pïïu, piɔ̈ndï ë yal në Yïn.

² Tɔ ya tïŋ riɛldu, ku dhuëëŋdu, cït man cän Yï tïŋ tëɣeric.

³ Nhiëërduön agɔk aŋuän në pïïr, Yïn bä leec në yathok.

⁴ Yïn bä aa thieei në pïïrdï yic, yɛn bï yacin yaak nhial ke Yï läŋ.

⁵ Piɔ̈ndï ë kuɛth cït man ë kë cam miök ë yuɔɔmic, yɛn bï diɛt ke miɛtëpiɔ̈u kɛ̈t Yïn.

⁶ Të yan tɔ̈c në agendï nɔm, ee Yïn ya tak, në wɛ̈ɛ̈ric ëbɛ̈n Yïn aa tak,

⁷ në luɔi Yïn konydï. Në atïm de wuökdu yic, yɛn ee diɛt ke miɛtëpiɔ̈u ket.

⁸ Yɛn cï rɔt nöök ë Yïn, ku ciindu ee yɛn muk aril.

⁹ Kɔc kɔɔr bïk wëikï nyaai, abïk lɔ piny paan ë thuɔɔu.

¹⁰ Abïï keek nɔ̈k në abätäu, ku guupken abïï kɔ̈ɔ̈rgɔl ke cam.

¹¹ Në biäk bï Nhialic yen tɔ tiëm, go melik piɔ̈u miɛt. Kɔc ee kuëëŋ në rin ke Nhialic abïk dhuëëŋ yök, ku thook ke kɔc ee lueth töör abïï ke miɛɛm.