Diɛt 62 - JAM DE NHIALIC 2011

Aŋäth de Gël ë Nhialic

¹ Ee Nhialic Yen atiɛɛt bïï yɛn kony, ee Yen ŋääth Yetök

² Yen Yetök, Yen aye kuurdï ku Ye konydï, ee tëdiën ë riɛl, ee ya gël, yɛn cïï duëërë tiaam.

³ Agut cï nɛn, yen bä wek raan tök jɔ aa mak wedhie, raan cïn riɛl cï kal wiɛ̈ɛ̈k?

⁴ Week akaarkï bäk bɛ̈ɛ̈i bei tëdɛn ë dhuëëŋ, wek ee piɔ̈ɔ̈th miɛt në lueth. Wek ee jam në wël ke athiɛɛi në we thook, ku wepiɔ̈ɔ̈th thïn aa aciɛɛn.

⁵ Yɛn ŋäth Nhialic Yetök, yɛn cï aŋäthdï tääu ë yeguöp.

⁶ Yen Yetök ee kuurdï ku Ye konydï, ku Ye tëdiën ë riɛl yɛn cïï duëër ë lath.

⁷ Kuɔɔnydï kekë dhuëëŋdï atɔ̈ukï tëde Nhialic, Yen ee kuurdiën ril, Yen ee tëdiën ë thiaan Yen Nhialic.

⁸ Kɔckï yak, Nhialic ŋɔ̈ɔ̈th aköölnyïïn. Yak lɛ̈k kë nuan week ëbɛ̈n, Nhialic ee tëde thiaan.

⁹ Kɔc kedhie acïtkï wëi, në pial, röördït ku kɔc kor acïnkï naamden. Na them ke në athëm, acïnkï kuën, keek apiɔlkï awär wëi.

¹⁰ Du tɔɔŋ ee ŋɔ̈ɔ̈th, du ye ŋɔ̈ɔ̈th nɔn bïï yïn kuɛth në ruööm, na cak kaku juëc, du keek ee ŋɔ̈ɔ̈th.

¹¹ Acä piŋ ke lueel ë Nhialic nɔn ye riɛl këde Nhialic Yetök,

¹² ku kë ee tɔ̈u ke Yïn Bɛ̈nydït ee nhiëër agɔk. Në luɔi Yïn raan ëbɛ̈n, gäm ariöp rɔ̈ŋ kekë luɔide.