Diɛt 59 - JAM DE NHIALIC 2011

Lɔ̈ŋ de Luääk

¹ Luäk ɛn në kɔc ke aterdï Nhialicdï, gël ɛn në kɔc ee ya mak!

² Luäk ɛn në ee kɔc rackë, kony yɛn në kɔc ee kɔc nɔ̈k!

³ Tïŋ keek atitkï bïk ya nɔ̈k, kɔc rac piɔ̈ɔ̈th acïk röt mat bïk a luöi tɔŋ. Acie baŋ de kërac ayï awäny cä looi,

⁴ acie baŋ de awänydï Bɛ̈nydït, yen le kek në ɣäänken yiic.

⁵ Jɔt rɔt Bɛ̈nydït Nhialic Awärjäŋ, ku kony ɛn, tïŋ ë Yïnyin Nhialic de Yithriɛl! Jɔt rɔt ku luöiyë juöör ëbɛ̈n këtuc, du kɔc rac ee kɔc yɔŋ nyuth kokëpiɔ̈u.

⁶ Ayek bɛ̈n ciëën thëën, ke ke ŋäär cït jɔ̈k, të jɔ kek cath në pänydït yɔu.

⁷ Piŋ lɛ̈ɛ̈tden kekë guɛ̈ɛ̈kden, liëpken acïtkï abätɛ̈ɛ̈u në ke thook, ku aŋoot ke yek tak an cïn raan piŋ keek.

⁸ Ku aye keek dɔl gup Bɛ̈nydït, Yïn ee juöör mac yiëth dɔl gup kedhie.

⁹ Yɛn ŋäth riɛldu, yïn ee konydï Nhialic.

¹⁰ Nhialicdï tɔ nhiëërduön agɔk yök ɛn, abï yɛn tɔ tïŋ kɔc ke aterdï ke ke cï tiaam.

¹¹ Du ke näk Nhialic, ago kɔckï nïïm cïï mär. Thiäi ë keek piny në riɛldu, Bɛ̈nydït, yïn ee könda!

¹² Kërac anu në ke thook, wëlken ëbɛ̈n ayek rɛ̈ɛ̈c. Adï jɔ ke dɔm në lɛcden! Në baŋ ye kek ciëën ku törkï käŋ,

¹³ Riɔ̈ɔ̈r keek në ŋeenydu, riɔ̈ɔ̈r keek taitai. Ago raan ëbɛ̈n jɔ ŋic nɔn mɛc ë Nhialic Yithriɛl, ku riɛlde ee ɣet ë piny thar ëbɛ̈n.

¹⁴ Kɔc ke aterdï ayek bɛ̈n ciëën thëën, ke ke ŋäär cït jɔ̈k, të jɔ kek cath ë pänydït yɔu.

¹⁵ Acïtkï jɔ̈k tai ke ke kɔɔr cäm, ku yek biɔ̈u të kën kek këcam kueth keek yök.

¹⁶ Ku yɛn bï riɛldu piɔɔny, ku piaany nhiëërduön agɔk miäk rial. Në baŋ Yïn gëlgëldï, ku konydï në aköölkiën ke nuan.

¹⁷ Nhialic riɛldï, Yïn bä piɔɔny në diɛt, Nhialic ee gëlgëldï, Nhialiny ee yɛn nyuöth nhiëër agɔk.