Diɛt 56 - JAM DE NHIALIC 2011

Lɔ̈ŋ de Luöi bïï Nhialic Ŋɔ̈ɔ̈th

¹ Nhialic kokëpiɔ̈u we yɛn, në luöi ye kɔc ke ater yɛn mak, kɔc ke aterdï, ayek ya yɔŋ aköölnyïïn.

² Aköölnyïïn ëbɛ̈n kɔc man yɛn ayek a yiɛ̈n tɔŋ, ade kɔc juëc biök në yɛn.

³ Të cän riɔ̈ɔ̈c, Bɛ̈nydït Awärjäŋ, ee yïn ya ŋɔ̈ɔ̈th.

⁴ Yɛn ŋäth Nhialic yɛn cïï bï riɔ̈ɔ̈c, abä leec në biäk de gutguut cï lueel. Eeŋö duëër ë raan luöi yɛn?

⁵ Aköölnyïïn kedhie, kɔc ke aterdï ayek ya kɔ̈ɔ̈r nuan, ayek mat ë ceŋ bïk yɛn luöi kërac!

⁶ Acïk kenïïm kut tëde thiaan ku jɔkï këdiën ya looi ëbɛ̈n woi, kɔɔr kek bïk a nɔ̈k.

⁷ Luöi ë keek këtuc Nhialic, në biäk de awänyden. Tiam ë kɔckë në agönhdu!

⁸ Yïn ŋic luöi cän nuan, yïn muk kuën de dhiëndï. Kën ë ke gɔ̈ɔ̈r në awerekdu yic?

⁹ Kööl cän Yï cɔɔl, kɔc ke aterdï abï ke pɔ̈k nïïm ciëën, yɛn ŋic ee kënë: Nhialic atɔ̈u kekë yɛn,

¹⁰ yen Nhialic yan wëlke leec, Bɛ̈nydït yan wëlke leec.

¹¹ Ee Nhialic Yen bä ŋɔ̈ɔ̈th, yɛn cïï bï riɔ̈ɔ̈c. Eeŋö duëër ë raan luöi yɛn?

¹² Nhialic yïn bä gäm kë cän gutguut lueel, yïn bä miɔɔc në miɔ̈c de alɛɛc.

¹³ Në luöi cï yïn ya kony në thuɔɔu, ku luäk ɛn në tiëm bïï ë ya tiaam. Në biäk ee kënë yɛn ee cath në Nhialic lɔ̈ɔ̈m, yɛn cath në ɣɛɛr ë kɔc pïïr riaau.