Diɛt 55 - JAM DE NHIALIC 2011

Lɔ̈ŋ de Raan cï Mɛ̈thëde Nyiɛɛn

¹ Piŋ lɔ̈ŋdï Nhialic, du rɔt yiɛl wei ë lɔ̈ŋdiënë.

² Ye lɔ̈ŋdï piŋ, ku pɔ̈kë nɔm ɛn, yɛn cï nuan në diɛɛr an diɛɛr.

³ Yɛn cï ë guɛ̈ɛ̈k de kɔc ke aterdï riääc, yɛn cïï yaaŋ de kɔc rac dumic. Acïk nuɛɛn yiɛ̈n ɛn, agöthkï në yɛn ku mankï yɛn.

⁴ Yɛn cï reem piɔ̈u thïn, ku riɔ̈ɔ̈c de thuɔɔu acï a dumic.

⁵ Yɛn lɛthë në riɔ̈ɔ̈c, yɛn cï riɔ̈ɔ̈cdït tiaam.

⁶ Adï ja nɔm dɛ wuök cït guuk, guɔ päär ke ya lɔ lɔ̈ŋ.

⁷ Yɛn duëër pɛ̈ɛ̈r tëmec, ku la rɛ̈ɛ̈r ë jɔ̈ɔ̈ric.

⁸ Yɛn duëër dap lɔ tëdiën de atiëp, tëmec në amaŋ ku apiöök.

⁹ Bɛ̈nydït, riäk kiɛɛr rɛɛc de kɔc ke aterdï, ku liääpë jamden! Yɛn cï akuöörkuöör ku awuɔɔu tïŋ ë pänydït yic,

¹⁰ acïk tuɔɔk cil akɔ̈l ku wakɔ̈u, ku thiäŋkï në cuɛ̈ɛ̈r kekë agööth,

¹¹ Ade riääk wutic ëbɛ̈n, yaaŋ kekë mɛth acïk kuɛɛr thiɔ̈ɔ̈ŋiic.

¹² Na ë kɔc ke ater kek ë lɛ̈ɛ̈t ɛn, aduëër guum, na ë kɔc ke ater kek ë jɔt röt ɛn, yɛn duëër thiaan.

¹³ Ku ee yïn raan ee cak ke yɛn, raan thiëëk wok ku ye mɔ̈th.

¹⁴ Raan wään ye wok jam apiɛth ëtök, ku yok abärɔ mat ëtök ɣön ë Nhialic.

¹⁵ Tɔ thuɔɔu jɔt kɔc ke aterdï ëthiäu, tɔ ke lɔ piny paan ë thuɔɔu ke ke pïïr, tɔ ke lɔ ë rɛ̈ŋken yiic në riɔ̈ɔ̈c!

¹⁶ Ku yɛn bï Bɛ̈nydït Nhialic cɔɔl bï a kony, ku abï yɛn luök.

¹⁷ Miäk rial ku akɔ̈l ku wakɔ̈u, göönydï kekë teerdï ayek lɔ nhial të nu yen, ku abï ya piŋ röl.

¹⁸ Abï yɛn bɛ̈ɛ̈i ciëën në pial de guöp, tëde tɔɔŋ juëc cä biök wokë kɔc juëc ke ater.

¹⁹ Nhialic ceŋ piny athɛɛr, abï ya piŋ röl ku tiɛɛm keek, në baŋ cïï kek gäm rɛɛc, ku cïkï ee riɔ̈ɔ̈c në Yen.

²⁰ Raan ye wok cath acï määthke mak acï gutguutke dhoŋ kɔ̈ɔ̈th.

²¹ Wëlke atɛ̈ckï cït man ë miök yat, ku aman kɔc në yepiɔ̈u thïn, wëlke ayek kɔc dɔ̈m mïth cï miök, ku ayek tem cït abätɛ̈ɛ̈u moth thok.

²² Tääuwë nuandu ë Bɛ̈nydït kɔ̈u, ku abï yïn gël, acïï kɔc piɛthpiɔ̈ɔ̈th bï tɔ tiam.

²³ Ku yïn Nhialic, bɛ̈ɛ̈iyë kɔc ee kɔc nɔ̈k ku kɔc ee käŋ töör, tɔ ke lɔ në raŋic, ke biäk de runken ë kën kɔn thök. Ku në biäkdï, yɛn bï Nhialic ŋɔ̈ɔ̈th.