Diɛt 50 - JAM DE NHIALIC 2011

Läm Yic

¹ Awärjäŋ Bɛ̈nydït Nhialic ajam, acɔl pinynɔm ëbɛ̈n, gɔl aköl amiäk le aköl athɛ̈i.

² Nhialic ee riau në Dhiɔn, läk de pänydït ee dikëdik.

³ Nhialicda abɔ̈, ku acïï thok mim, many ee kɔc cuääl anu ë Yenɔm tueŋ, ku amaŋdït acath ë Yelɔ̈ɔ̈m ke wil Ye piny.

⁴ Ee paannhial cɔɔl kekë piny bïk bɛ̈n daai, të guiir En löŋ de kɔcke.

⁵ Aye lueel an, “Mätkï röt kɔckiën adööt, kɔc wään mac löŋ në Yɛn, në miɔ̈c näk!

⁶ Paannhial alueel piathëpiɔ̈u de Nhialic, an Yen guöpde ee Bɛ̈nydïït ee löŋ guiir.

⁷ “Piëŋkï kɔckï ku Yɛn bï jam, Yɛn bï aa cäätɔ lueel këdun, Yɛn ee Nhialic, Nhialicdun.

⁸ Ku wek cä ye jɔ̈ɔ̈ny në biäk de miɔ̈cduön ye nɔ̈k kekë miɔ̈c ye nyop ëbɛ̈n yak cool ë bɛ̈ɛ̈i wek keek në Yanɔm.

⁹ Ku ënɔɔnë Yɛn cïï ɣɔ̈k kɔɔr paandu, ku nɔn ee nyök në lunydu yic.

¹⁰ Läi nu roor kedhie ayek kakï, ku aguum ke ɣɔ̈k nu në kur nïïm ayek kakï.

¹¹ Diɛt roor kedhie ayek kakï, ayï ka pïïr piny kedhie ayek kakï.

¹² “Na dɛ guöp cɔk, yïn cä duëër thiëëc në këcam, në baŋ ye pinynɔm ëbɛ̈n kekë ka nu thïn kedhie kakï.

¹³ Ya cam në rïŋ ke miöör, ku ya dek në rim ke bɔɔth?

¹⁴ Miɔc Nhialic në miɔ̈c de thieithieei, ku gämë Nhialic Awärjäŋ këduön cï yïn gutguut lueel.

¹⁵ Ye ya cɔɔl në kööl cïï nuan bɛ̈n, yïn bä kony, ka yïn bï Ya dhuëëŋ guöp.”

¹⁶ Ku tëde raan ee karɛc looi aye Nhialic lɛ̈k en an, “Eeŋa gëm yï yic duëër yïn lööŋkï aa lueel? Ku nɔn jam në baŋ de mändï në yï liep?

¹⁷ Yïn man dui ku yïn ee wëlkï waan ë yïkɔ̈u.

¹⁸ Të cïï yïn cuɛ̈ɛ̈r tïŋ yïn ee määth we yen ku yïn ee mat wekë akɔɔrdiäär.

¹⁹ Thoŋdu ee kërac yen ye lueel, ku liemdu ke tör ë lueth.

²⁰ Yïn ee nyuc ku jam në ater wokë wänmuuth, ku yïn ee wën ë moor läät.

²¹ Yïn cï ë kakë looi kedhie, ku Yɛn aa mim thok, aye cät an, Ya Raan cït yïn. Ku ënɔɔnë yïn bä jääm ku kuɛɛn awɛ̈ɛ̈cku në yïnɔm.

²² “Piɛŋkï kënë, wek kɔc ee nïïm määr në Nhialic, ke we cä bï riɔ̈ɔ̈k, ku acïn raan bï we luök.

²³ Raan ee miɔ̈c ee thieithieei gam, ee Ya dhuëëŋ guöp, ku raan ee kueerde tɔ lɔ cït, abä nyuöth kuɔɔny de Nhialic.”