Diɛt 5 - JAM DE NHIALIC 2011

Lɔ̈ŋ de Gël

¹ Bɛ̈nydït piŋ jamdï, ku tïŋ dhiën dhiaau ɛn.

² Piŋ dhiën kaar ɛn kuɔɔny, Nhialinydï ku ye Meliŋdï! Ee Yïn Aläŋ!

³ Yïn ee ya piŋ röl miäk rial, yɛn ee lɔ̈ŋdï gam të bï aköl thok, ku tiɛɛt ke bä bɛ̈ɛ̈r.

⁴ Yïn cie Nhialic ee piɔ̈u miɛt we kërɛɛc ye kɔc looi, acïn kërac ye kɔɔr në Yïlɔ̈ɔ̈m.

⁵ Yïn cïï duëër kɔ̈ɔ̈c në biäk de kɔc ee röt lɛɛc, Yïn man kɔc ee kërac looi kedhie.

⁶ Yïn ee kɔc ee lueth töör riɔ̈ɔ̈k kedhie, Yïn man kɔc ke akuöörkuöör, ayï kɔc ee mɛth.

⁷ Ku në biäk ë nhiëërduön agɔk, yɛn duëër bɛ̈n ɣöndu, yɛn bï lam Luaŋduön ɣeric ku guöt a nɔm piny në Yïnɔm në riëëu.

⁸ Bɛ̈nydït, kɔc de ater në yɛn ajuëckï! Wat ɛn ë piathëpiɔ̈u, bä këde piɔ̈ndu looi, tɔ kueerdu tiëc ë yanɔm aguɔ kuany yic.

⁹ Jam ye kɔc ke aterdï lueel acïï duëërë ŋɔ̈ɔ̈th, ee riääk yetök, yen kɔɔrkï. Jamden ee luenh täc, ku athiäŋ ke mɛth rac.

¹⁰ Luöi ë keek këtuc Nhialic, tɔ kiɛɛr rɛɛcdɛn yïn keek riääk. Cuɔpë ke wei në Yïlɔ̈ɔ̈m, në biäk de awɛ̈ɛ̈c juëc yek looi, ku luɔi reec kek Yïn.

¹¹ Ku tɔ kɔc ee kuɔɔny yök tëde Yïn kedhie mit piɔ̈ɔ̈th, aduëërkï aa ket ë ceŋ në miɛtëpiɔ̈u. Kony kɔc nhiaar Yïn, në biäkdu ee yen amit kek piɔ̈ɔ̈th ë yic.

¹² Yïn ee kɔc piɛthpiɔ̈ɔ̈th thieei Bɛ̈nydït, ku nhiëërdu yen ee kön ee ke gël.