Diɛt 49 - JAM DE NHIALIC 2011

Pialëpiɔ̈u de Ŋäth ë Kuɛth

¹ Piɛŋkï kënë, wek kɔc wedhie! Piëŋkï wek kɔc ceŋ pinynɔm,

² röördït ku kɔc kor ëbɛ̈n kɔc kueth ku kɔc kuanynyïïn kedhie.

³ Thoŋdï abï jam në pɛlënɔm, ku jam piɔ̈ndï në yöŋ de käŋiic.

⁴ Yɛn bï yayïth aa wɛ̈l kääŋ, ku waar ke yiic në kiët ë thom.

⁵ Eeŋö duëër ɛn riɔ̈ɔ̈c të cï akööl ke kërac bɛ̈n, të cï kɔc ke ater a gɛɛu cil,

⁶ kɔc ee karɛc looi ŋäth kuɛthden ee röt lɛɛc në wëukɛn juëc,

⁷ Acïn raan duëër wëike waar, ku nɔn gëm Nhialic wëu wɛɛr en wëike,

⁸ në luɔi ye wɛ̈ɛ̈rë yenh de mɛnh ë raan këtuc thok. Wëu duëërku ke gam acïkï duëër kɔn lëu

⁹ bïk wo pɛ̈n lɔ në raŋic, ku tɔkï wo pïïr aɣet athɛɛr.

¹⁰ Të tïŋ wok en raan pelnɔm, ee thou, ku raan piɔlpiɔ̈u kekë dhɔ̈n ayek thou aya. Keek kedhie ayek kakɛn juëc nyäŋ mïth ke mïthken.

¹¹ Rɛ̈ŋken ayek ɣöötken aɣet athɛɛr, të bï kek lɔ rɛ̈ɛ̈r në run kedhie, na cakaa kek ë de nïïm piny ë ye cɔɔl në rinken.

¹² Kajuëc ke raan acïkï yen ee luök në thuɔɔu, abï ŋoot ke thou cït man ë läi.

¹³ Tïŋ kë ye tuöl tëde kɔc ee röt ŋɔ̈ɔ̈th, thon ë kɔc cï lɔ̈ŋ në kakɛn juëc yiic,

¹⁴ cït man de amɛ̈l cï lɔ̈c thuɔɔu, thuɔɔu yen abï aa tïnden. Abïk lɔ paan ë thuɔɔu raan tök, kɔc lɔ piɔ̈ɔ̈th wai abïk nu në kenïïm, ku gupken abïk riääk, paan ë thuɔɔu abï aa baaiden.

¹⁵ Ku Nhialic abï yɛn luök, abï ya kony në riɛl de paan ë thuɔɔu.

¹⁶ Du ee diɛɛr, të cï raan dɛ kajuëc, ku të cï baaide kuɛth ke këriëëc ëbɛ̈n,

¹⁷ acïn kë bïï jɔt ke yen ëtök të le yen thou, wëuke acïï ke bï lɔ̈ɔ̈k bɛ̈ɛ̈i në yecök në raŋic.

¹⁸ Na cak raan rɔt yök ke mit piɔ̈u në kajuëc ë pïïrë, ku ye leec në luɔi le kake ke ke juëc,

¹⁹ ke yen abï dhil lɔ tëde kuarken cök në thuɔɔu të cïï akɔ̈l bï bɛ tïŋ nyin.

²⁰ Juëc de kake ku dïtde acïï yen bï pɛ̈n thuɔɔu, abï ŋoot ke thou cï läi.