Diɛt 48 - JAM DE NHIALIC 2011

Dhiɔn ee Pänydït de Nhialic

¹ Bɛ̈nydït adït, ku abï ya piɔɔny aläl, në Pänydït ë Nhialicda yic, ku në kuurdɛn ɣeric nɔm.

² Dhiɔn kuur de Nhialic, athöny ku aläk, atɔ̈u të lɔ rut, Pänydït de melik dït ee miɛtëpiɔ̈u yiɛ̈n pinynɔm ëbɛ̈n.

³ Acï Nhialic nyooth nɔn nu ë kuɔɔny ke yen në gëlgël de pänydït yic.

⁴ Meliik ayek keyiic määt, ku bïk kuur de Dhiɔn bɛ̈n mak.

⁵ Ku na wën lek tïŋ, acïk bɛ̈n gäi, acïk bɛ̈n riɔ̈ɔ̈c ku kɔtkï.

⁶ Ëtɛ̈ɛ̈n acïï riɔ̈ɔ̈c ke bɛ̈n dɔm ku arɛɛm, cït arɛɛm ë tiiŋ kɔɔr dhiëth,

⁷ cït man ye abëël wïïr ke Tarcic miɔɔkic në yom ee bɛ̈n të lɔ aköl amiäk.

⁸ Wok cï kë cïï Nhialic looi piŋ, ku ënɔɔnë acuk tïŋ ë pänydïït de Nhialicda, Bɛ̈nydït de rɛm, abï pänydït gël aɣet athɛɛr.

⁹ Nhialic, wok ee nhiëërduön agɔk tɔ̈u ë luaŋdu yic tak.

¹⁰ Yïn ye leec në kɔc ë ɣään yiic ëbɛ̈n, ku lɛcdu ee ɣet ë piny thar ëbɛ̈n, Yïn ee löŋ ŋiëc guiir,

¹¹ tɔ kɔc ke Dhiɔn mit piɔ̈ɔ̈th! Yïn ee löŋ de kɔc ŋiëc guiir apiɛth, tɔ miɛtëpiɔ̈u nu ë pɛ̈ɛ̈nydït ke Juda yiic!

¹² Kɔc ke Nhialic, yak cath ke we wil Dhiɔn ku kuenkï aloc,

¹³ Tïŋ täu de kɛ̈l ke pänydït kekë ɣään cï gël, aguɔkï lɛ̈k rɛm kɔ̈k bï lɔ̈ɔ̈k bɛ̈n:

¹⁴ “Nhialicë ee Nhialinyda aɣet athɛɛr, abï wo wat në nïn bɔ̈ tueŋë yiic kedhie.”