Diɛt 46 - JAM DE NHIALIC 2011

Nhialic anu ke Wook

¹ Nhialic Yen ee gëlgëlda ku riɛlda, atɔ̈u ëceŋ ke bï wo kony në akööl ke nuan.

² Ka wook cïï bï riɔ̈ɔ̈c. Na cak piny rɔt niɛŋ, ku lɛthë kur ke abäpdit thäär piny,

³ Na cakaa wɛ̈ɛ̈r yen ë nieŋ rɔt në awuɔɔu, ku nieŋ ɣään thɔ̈ny röt në tɔɔŋ.

⁴ Ade kiir ye nyïïnke miɛtëpiɔ̈u yiɛ̈n pänydïït de Nhialic, tëɣeric ceŋ ë Nhialic Awärjäŋ.

⁵ Nhialic anu ë pänydïïtë yic, ku acïï bï riɔ̈ɔ̈k taitai, aye Nhialic kony miäk adurduur.

⁶ Juöör ayek riɔ̈ɔ̈c ku lɛthë ciɛɛŋ Nhialic ee määr cï deŋ, go piny lëëŋ.

⁷ Bɛ̈nydït de rɛm atɔ̈u ke wook, Nhialic de Jakop ee tëdan ë thiaan.

⁸ Bä tïŋ kë cï Nhialic looi. Tïŋ kagɛ̈iyë cï ke looi ë pinynɔm

⁹ Acï tɔɔŋ dɔ̈m kɔ̈ɔ̈c ë pinynɔm ëbɛ̈n, acï dhɛ̈ŋ dhoŋ kɔ̈ɔ̈th, ku riëëk tɔɔŋ, ku nyop abëël ke tɔŋ në mac.

¹⁰ Go lueel an, “Dɔ̈mkï tɔŋ kɔ̈ɔ̈c, ku ŋiɛckï ee Yɛn Nhialic, Yɛn adït, në juöör ke pinynɔm nïïm, ku Yɛn adït në pinynɔm ëbɛ̈n.”

¹¹ Bɛ̈nydït de rɛm atɔ̈u ke wook, Nhialic de Jakop Yen ee tëdan ë thiaan.