Diɛt 45 - JAM DE NHIALIC 2011

Din de Thiëŋ de Bääny

¹ Piɔ̈ndï acï thiäŋ kekë wëlpiɛth, të la yɛn ke ya piɔny melik. Liemdï ë rɔt guiir cït man ë raan ŋic gäär aläl.

² Yïn ee raan töŋ piɛth në mïth ke kɔc yiic. Ku yïn cï tɔc thok në dhuëëŋ. Në baŋ cï ë Nhialic Yï thieei aɣet athɛɛr.

³ Duöötë abätäudu ë yïyɔu yïn raan töŋ ril, në dhuëëŋdu, ku bäänydu.

⁴ Në bäänydu lɔ tueŋ në tiëm, në biäk bï yïn yic kony kekë piathëpiɔ̈u. Riɛldu abï yïn yiɛ̈n tiëm dït!

⁵ Dhɛ̈ŋku amothkï thook, ayek kɔc de ater ë melik rɛt piɔ̈ɔ̈th, juöör ayek lööny piny ë yïcök

⁶ Thöönydu ee thööny de Nhialic, abï tɔ̈u aɣet athɛɛr. Thienyduön de yith yen abï ya thieny de bäänydu,

⁷ Yïn nhiaar piathëpiɔ̈u ku man rɛ̈ɛ̈c. Yeka cïï Nhialic, Nhialicdu yïn tɔc në miök de miɛtdepiɔ̈u awär meliik kɔ̈k.

⁸ Lupɔɔku acïk kɔ̈ɔ̈th thiäŋ në aŋiëër de mer ku aloyeth, ku kathiya, kɔc ee ket aleckï yïnɔm, ɣönduön de bääny cï jämic në tuŋ ke akɔ̈ɔ̈n.

⁹ Duet ke meliik anukï në diäärkuön ke dhuëëŋ yiic, ku tiiŋ melik akääc në baŋ cuënydu, ke ceŋ adhäm de opir.

¹⁰ Piɛŋkï kë luɛɛl wek duet, määrkï nïïm në kɔckun ayï kɔc baai de wuur.

¹¹ Läkdun abï we tɔ kɔɔr ë melik, në luöi yen bɛ̈nydun, yak riëëu.

¹² Kɔc ke Tayer abïk bɛ̈n tëde Yïn në miɔ̈c, kɔc kueth aläl abïk yïn gäm miɔ̈c.

¹³ Tiiŋ de melik anu ɣön ë melik, tiëŋkï läkde! Lupɔde acï looi në alanh de adhääp.

¹⁴ Aye yiɛ̈n melik ke ceŋ lupɔdɛn cï guel, ku kuɛny ë diëër lïïmke cök, keek aya aye ke yiɛ̈n yen.

¹⁵ Aye ke lɛɛr ɣöt në miɛtëpiɔ̈u ku piɔ̈n ayum, ku lekï ɣön de melik.

¹⁶ Yïn melik, yïn bï nɔm dɛ wɛ̈ɛ̈t juëc, mïth bï tëde kuarkun nööm, abä keek tɔ ye wɛ̈ɛ̈t bäny në pinynɔm ëbɛ̈n.

¹⁷ Yɛn bï rinku tɔ ye luöi dhuëëŋ në rɛm ëbɛ̈n, kɔc kedhie abïk Yïn aa leec në nïn bï bɛ̈n kedhie aɣet athɛɛr.