Diɛt 44 - JAM DE NHIALIC 2011

Lɔ̈ŋ de Gël

¹ Acuk piŋ në wo yïth, Nhialic, acï wärkuɔ lɛ̈k wo, acïk wo lɛ̈k kagɛ̈iyë cï looi në aköölken yiic, akööl ɣɔn thɛɛr:

² Yïn ë juöör kuaath wei në ciindu ku com kɔcku pinyden, Yïn cï juöör riɔ̈ɔ̈k, ku tɔ kɔcku lok.

³ Kɔcku aake cïï piny rum në abätäu, acie cinken kek ë tɔ ke tiëm. Ee ciin cuënydu, kekë köŋdu. Ku many de Yïn nyin, në luɔi nhiɛɛr Yïn keek.

⁴ Yïn ee melikdï ku Nhialicdï raan ë gëm tiëm Jakop,

⁵ ku në riɛldu wok cï kɔc ke aterda jäp ciëën. Në rinku wok cï kɔc ke ater dum.

⁶ Yɛn cïï dhaŋdï ee ŋɔ̈ɔ̈th, ku cä abätäudï ŋɔ̈th bï yɛn kony,

⁷ ku Yïn cï wo tɔ tiam kɔc ke aterda, ku tɔ kɔc man wook mum nïïm.

⁸ Wo bï Nhialic piɔɔny ë ceŋ, Yïn buk lɛ̈k rin thieithieei aɣet athɛɛr.

⁹ Ku ënɔɔnë Yïn cï wo rɛɛc ku tɔ wo tiam, Yïn cie bɛ lɔ biic wekë rem de tɔŋda.

¹⁰ Yïn cï wook tɔ kɔt në kɔc ke atɛɛrda, ka kɔc man wook acïk kaku peec.

¹¹ Yïn cï wo tɔ temë röt cït man ë thök, ku thiäi ë wo piny në juööriic.

¹² Yïn cï kɔcku ɣaac në wëu cie wëu, ku cïn kë cï yök në ɣööcdenic.

¹³ Yïn cï wo tɔ geet gup në kɔc thiääk në wook, ku dɔlkï wo gup ku buikï wo gup.

¹⁴ Yïn cï wo tɔ ye kɔc ye juöör biɔɔn gup, ku ayek kenïïm bet ke ke dɔl wo gup.

¹⁵ Ayärdï anu në yanɔm aköölnyïïn ëbɛ̈n, ka riɔ̈ɔ̈c de guöp ee ya kum nyin,

¹⁶ kɔ̈k ayek wo geet gup ku lɛ̈ɛ̈tkï wo, të tïŋ kek kɔc ke aterda ke ke guur röt në wook.

¹⁷ Kakë kedhie acïk röt looi tëde wook, cakaa nɔn kën wok nïïm määr në Yïn, ku kënku mändu nyääŋ piny.

¹⁸ Wok kën jamdu kɔn jäi, ku kueerdu akënku kɔn rɛɛcic.

¹⁹ Ku ënɔɔnë Yïn cï wo nyääŋ piny tëde kɔ̈ɔ̈rgɔl, ku nyääŋë wo piny në mɔ̈ɔ̈thdït yic.

²⁰ Na ë wo cïï nïïm määr në Nhialicda, ku nɔn cuk wo cin täär yiëth kɔ̈k,

²¹ ke Yïn aduɛ̈ɛ̈rë ŋic, ë luöi ŋic Yïn kë cïï ë raan thiaan në yepiɔ̈u.

²² Në biäkdu, wok ee nɔ̈k ë akööl nyïïn ëbɛ̈n, wo cï tɔ cït thök ye tɛm röt.

²³ Pääcë, Bɛ̈nydït! Eeŋö ee Yïn niin? Jɔt rɔt! Du wo rɛɛc aɣet athɛɛr.

²⁴ Eeŋö ee Yïn thiaan në wook? Du nɔm mär në nuanda kekë yaaŋ yɔŋë wook!

²⁵ Wok cï wïïk piny në abuui yic, wo cï nuɛt piny ë tiëm.

²⁶ Jɔt rɔt Nhialic ku kony wook! Në biäk de nhiëërduön agɔk!