Diɛt 42 - JAM DE NHIALIC 2011

Awerek de Rou ( Diɛt 42–72 ) Lɔ̈ŋ de Raan cï Peec

¹ Cït man ye guil pïïu kɔɔr, yen aye täu kɔɔr ë piɔ̈ndï yïn Nhialic.

² Piɔ̈ndï ë yal ë Nhialic, ë yal në Nhialic pïïr. Ee nɛn, yen bän Nhialic tïŋ nyin?

³ Pïïu ke yanyin acïk aa këcamdï aköl ku wakɔ̈u, të ye kɔc ke aterdï a yɔ̈ɔ̈k aköölnyïïn an, “Nu Nhialicdu ë nou?”

⁴ Kakë aya keek tak, të yan yapiɔ̈u lueel, në täu wään yan lɔ wo kuut ɣön ë Nhialic, ku wat keek të jɔ wok lɔ ke wo cath kuut mit piɔ̈ɔ̈th, kït në röldït ë diɛt ke thieithieei.

⁵ Eeŋö dhiaau ɛn piɔ̈u? Ku eeŋö diɛɛr ɛn? Yɛn bï aŋäthdï tääu në Nhialic guöp, ke bä bɛ leec, yen konydï ku Nhialicdï.

⁶ Të rɛ̈ɛ̈r ɛn ë pɛ̈cic, yɛn dhiau piɔ̈u. Guɔ Yïn jɔ tak ee tënë piny de Jordan, ku kuur ë Ɣermon tëde kuur ë Midhar.

⁷ Apiöŋduön de pïïu acï röt luööŋ në yanɔm, cït abäpdit cï göth, ku nɔn ee pïïu cï dhoŋ.

⁸ Në Bɛ̈nydït nyooth nhiëërdɛn agɔk aköl, ku wakɔ̈u dinde ee tɔ̈u kekë yɛn, ke ya läŋ Nhialic de pïïrdï.

⁹ Aya lɛ̈k Nhialic kuurdï an, “Eeŋö mɛ̈ɛ̈r Yïn nɔm në yɛn? Eeŋö duɛ̈ɛ̈r ɛn cath ke ya dhiau, ku yɔŋ ɛn në kɔc ke ater?”

¹⁰ Yɛn cï guöp tɔ̈ɔ̈k në kɔc ke aterdï në yöökdɛn yek kek cool ë yöök ɛn an, “Nu Nhialicdu ë nou?”

¹¹ Eeŋö dhiaau ɛn piɔ̈u? Ku eeŋö diɛɛr ɛn? Yɛn bï aŋäthdï tääu në Nhialic guöp, ke bä bɛ leec, yen konydï ku Nhialicdï.