Diɛt 40 - JAM DE NHIALIC 2011

Din de Piɔ̈ny

¹ Yɛn ee Bɛ̈nydït tiit në piɔ̈n tök bï ya kony, ago ya piŋ thok, ku piŋ dhiëndï.

² Acï ya miëët bei pul ë riääkic, bïï yɛn bei në liɛɛt amïïtmïïtic ku tɔ ya kääc ë kuur nɔm, ku min ɛn cök piŋ.

³ Ku yïk a thok din ë piɛcë cak, din lɛɛc ɛn Nhialicda. Kɔc juëc abïk ee kënë tïŋ ku lamkï Nhialic. Ku ëtɛ̈ɛ̈n abïk Bɛ̈nydït jɔ ŋɔ̈ɔ̈th.

⁴ Thieithieei në raan ee Bɛ̈nydït ŋɔ̈ɔ̈th, raan cï rɔt ee pɔ̈k yiëth ku cï yenɔm puk kɔc ee yiëth lam.

⁵ Yïn cï kajuëc luöi wook Bɛ̈nydït Nhialicda. Acïn raan cït Yïn! Yïn cï kïït ke gäi juëc luöi wook. Yɛn cïï duëër jam ë biäkden ëbɛ̈n, kuënden adït aläl!

⁶ Yïn cie köör në miɔ̈c gëmë yïn, yïn cïï län ye nyop ëbɛ̈n në yïk nɔm ee kɔɔr, ku cïï miɔ̈c de kërac ee thiëëc. Yïn aa gëm ɛn yïth bän kë lueel aa piŋ,

⁷ aguɔ puk nɔm an, “Yakï, kakuön cï guiëër ɛn anukï në awerek de löŋic.

⁸ Aa nhiaar bä këde yïn piɔ̈u looi Nhialicdï, wëëtdu aya muk në yapiɔ̈u thïn.”

⁹ Luɔi cï yïn a kony, acä lɛ̈k akutnɔm dïït de kɔc juëc Bɛ̈nydït, acä ke guiëër wëlpiɛth. Aŋic nɔn cän bï kɔ̈ɔ̈c në guiɛɛr ë wëlpiɛth.

¹⁰ Yɛn kën kuɔɔnyduön de luäk thiaan në yapiɔ̈u, Yɛn kën nhiëërduön agɔk kekë piɔ̈nduön adöt moony. Në akutnɔm dïït de kɔc juëc yiic.

¹¹ Bɛ̈nydït du ɛn bï pɛ̈n kokdepiɔ̈ndu. Tɔ nhiëërduön agɔk ku piɔ̈nduön adöt ee yɛn tɔ rɛ̈ɛ̈r apiɛth aɣet athɛɛr.

Lɔ̈ŋ de Kuɔɔny

¹² Yɛn cïï ë nuɛɛn juëc gɛɛu cil, nuɛɛn juëc cïï duëërë lëu ë kuɛ̈n! Yɛn cïï awɛ̈ɛ̈ckï gïth, ka yɛn cïï daai ee bɛ lëu, ajuëckï awärkï nhïm ke yanɔm, ku yɛn cï piɔ̈u ŋɛɛr.

¹³ Kony ɛn Bɛ̈nydït! Dap a luök ënɔɔnë!

¹⁴ Yäär kɔc kɔɔr aa näkkï yɛn tɔ ke tiam ku mumkï nïïm. Kɔc kɔɔr an yïkï ya guöp bɔ̈t, cuɔpë ke wei abïk yäär.

¹⁵ Miɛɛmë kɔc ee ya geet guöp thook abïk yäär.

¹⁶ Ku tɔ kɔc ee yïn kɔɔr kedhie mitpiɔ̈ɔ̈th ku lek piɔ̈ɔ̈th yum në Yïyic. Tɔ lueel ë kɔc nhiaar kuɔɔnydu ë ceŋ an, “Bɛ̈nydït adït!”

¹⁷ Yɛn kɔ̈c ku kuany nyin, ku yïn kën nɔm määr ë yɛn. Yïn ee konydï ku Nhialicdï, dap ya bɛ̈n kony!