Diɛt 39 - JAM DE NHIALIC 2011

Raan cï Nuan Agam Awɛ̈ɛ̈c

¹ Acä lueel an, “Yɛn bï a thok tiit ëgɔk, ke ya cï bï wäc në yaliep, yɛn bï yathok roop të rɛ̈ɛ̈r ɛn wok ë kɔc rac.

² Yɛn ë thok a lik ke cïn kë luɛɛl, yɛn ë yathok roop na cakaa këpiɛth akɛ̈n lueel! Ku kënë ë ya bɛ̈n ŋuak agɔ̈th, 2

³ ku ë ya bɛ̈n ŋuak në jamë piɔ̈u. Të cän piɔ̈u jam aläl, ke ya jɔ piɔ̈u diu arëët. Aguɔ ja luɛɛl an,

⁴ “Bä jɔ pïïr aya agut cï nɛn Bɛ̈nydït? Bä thou nɛn? Lɛ̈k ë yɛn bï pïïrdï dap thök nɛn.”

⁵ Yïn ë ya gäm pïïr ciekic! Pïïrdï acït kë cïn këdäŋ tëde yïn. Pïïr de raan ëbɛ̈n acït man ë yom tëde yïn,

⁶ kɔc acïtkï atïïp. Ku luɔiden ëbɛ̈n ee ɣɔ̈ric, ayek käŋ määtic ke kuckï raan bï ke nööm.

⁷ Eeŋö däŋ pei bä ŋɔ̈ɔ̈th tëde Bɛ̈nydït? Ee yïn aya ŋɔ̈ɔ̈th Yïtök.

⁸ Kony ɛn në awɛ̈ɛ̈ckï, ku du dhɔ̈n ee tɔ get ɛn guöp.

⁹ Yɛn bï thok mim ke cïn kë luɛɛl, në luɔi yen yïn ë tɔ ya nuan aya.

¹⁰ Du ɛn be luöi këtuc! Yɛn cï duɛ̈ɛ̈r thou në duidu.

¹¹ Yïn ee kɔc gɔ̈k ku luöiyë ke këtuc në biäk de awɛ̈ɛ̈cken, ku yïn ee këdɛn nhiaarkï riɔ̈ɔ̈k cït man ë kɔ̈m. Ee yic, pïïr de raan ëbɛ̈n acït yom!

¹² Piŋ lɔ̈ŋdï Bɛ̈nydït, ku piŋ dhiëndï, bä kony ɛn të dhiaau ɛn. Yɛn ee kamandu në akööl liiakäŋ, cït man cïï kuarkuɔ kɔn keny.

¹³ Päl ɛn yatök aguɔ piɔ̈u bɛ miɛt tëthiinakäŋ, të kɛ̈n ɛn kɔn jäl ku cä bï bɛ tɔ̈u.