Diɛt 38 - JAM DE NHIALIC 2011

Lɔ̈ŋ de Raan cï Nuan

¹ Du ɛn ee dui në agɔ̈th Bɛ̈nydït! Du ɛn lui këtuc ke yï cï ŋeeny.

² Yïn ë ya moc në dhaŋdu, ka yïn ë ya wiɛt piny.

³ Yɛn cïï guöp piɔl në luɔi cï yïn piɔ̈u diu we yɛn, yɛn cïï jɔk dɔm në biäk de awänydï.

⁴ Awɛ̈ɛ̈ckï acïk ɛn doony, ka yɛn ë ciët kë ɣɛ̈ɛ̈c kathiek.

⁵ Bɔ̈tdï acï aa tɔ̈ɔ̈k, në biäk de dhɔ̈ɔ̈ndï.

⁶ Bɔ̈tdï ë dït ka yɛn cïï kɔ̈ɔ̈c be lëu, ka yɛn ee cool ke ya dhiau aköölnyïïn.

⁷ Yɛn dɛ̈p guöp wokë atuöc, ku yɛn cï thiɔ̈k wo thuɔɔu.

⁸ Yɛn cï tiaam arëët, ka yɛn ee piɔ̈u dhiau ku ya teer në arɛɛm.

⁹ Yïn ŋic kë kaar Bɛ̈nydït, ku Yïn ee teerdï piŋ.

¹⁰ Yɛn wiët piɔ̈u, ku riɛldï ë thök, ayï nyïïnkï acïkï be daai ëgɔk.

¹¹ Määthkï ku kɔc thiääk në yɛn acïkï ee bɛ̈n në yalɔ̈ɔ̈m, në biäk de tɔ̈ɔ̈kdï, ayï kɔc baaida acïk kat në yɛn.

¹² Kɔc kɔɔr bïk yɛn nɔ̈k ayek wïndɛn ë dɛ̈p dɛɛp, kɔc kɔɔr bïk ɛn luöi tëtöök ayek riääkdï leeŋ, ayek cool ë ciëk ɛn thok.

¹³ Yɛn ë ciët miŋ cie piŋ, ku cä ciët athok liep cie jam.

¹⁴ Yɛn ë ciët kɔc cie jam, në luɔi cïn en kë ya puk nɔm.

¹⁵ Ku yïn ŋääth Bɛ̈nydït, ku yïn Bɛ̈nydït Nhialicdï, yïn abï jamdï puk nɔm.

¹⁶ Du kɔc ke aterdï tɔ get ɛn guöp, du ke tɔ leec röt në luɔi cän wïïk!

¹⁷ Yɛn cï thiɔ̈k wokë thuɔɔu, arɛɛmdï ee rɔt cuuth.

¹⁸ Yɛn cï awɛ̈ɛ̈ckï gam, acïk ɛn nuaan në jamë piɔ̈u.

¹⁹ Kɔc de ater në yɛn arilkï ku apiɔlkï gup, kɔc juëc acïk ɛn maan baaŋ.

²⁰ Ayek këpiɛth cä looi puk nɔm në kërac, ayek ɛn cäk thok në luɔi yan ye them bä këpiɛth looi.

²¹ Du jäl ë yalɔ̈ɔ̈m, Bɛ̈nydït, du ɛn pɛ̈l wei, Nhialicdï!

²² Dap bɛ̈n, bä luäk ɛn, Bɛ̈nydït, konydiën de wëi!