Diɛt 37 - JAM DE NHIALIC 2011

Tëde Kɔc Rac ku Kɔc Piɛth

¹ Du ee diɛɛr në këde kɔc ee kërac looi, ku du ke ee til.

² Abïk dap riäär ëthiäu cït man ë wal ee riɛl, abïk biɔɔr cït man anin.

³ Ye Bɛ̈nydït ŋɔ̈ɔ̈th ku loi këpiɛth, ceŋ ee pinyë në pialëguöp.

⁴ Mitëpiɔ̈u wekë Bɛ̈nydït, ke bï yïn gäm ke kɔɔrë piɔ̈ndu.

⁵ Gämë kuɛɛrku Bɛ̈nydït, ye ŋɔ̈ɔ̈th, ku abï yï gël,

⁶ abï piathëpiɔ̈ndu tɔ riau cït man akɔ̈l, ku riau yicdu cït man aköl athɛ̈i.

⁷ Ŋɔ̈th Bɛ̈nydït ku tit, du piɔ̈u ee diu të cïï kɔc kɔ̈k kuɛth, ku nɔn ee të cïï kïït de raan rac tiam.

⁸ Du piɔ̈u ee diu ku du ee diɛɛr, ee kën ee raan lɛɛr në rɛ̈ɛ̈cic.

⁹ Piny abï lɔ̈ɔ̈k lak në kɔc ee Bɛ̈nydït ŋɔ̈ɔ̈th, ku kɔc rac abïï ke cuɔp wei.

¹⁰ Kɔc rac abïk dap riäär ëthiäu, abäk keek aa kɔɔr, ku acäkï keek bï yök.

¹¹ Ku kɔc ee röt kuɔɔr piny, abïk piny lɔ̈ɔ̈k lak, ku abïk kuɛth ku rëërkï ë mät.

¹² Kɔc rac ayek kiɛɛr rac luöi kɔc piɛthpiɔ̈ɔ̈th, ku ayek ke lec kääc në biäkden.

¹³ Ku Bɛ̈nydït ee kɔc rac geet gup, në luɔi ŋic en en nɔn cï aköölken guɔ thiɔ̈k.

¹⁴ Kɔc rac ayek näk në abätɛ̈ɛ̈u ku ayek moc në dhɛ̈ŋ nɛ̈k kek kɔc kuanynyïïn ku kɔc cïn käŋ, ku nɛ̈kkï kɔc ee yic looi,

¹⁵ ku abï keek nɔ̈k në abätɛ̈ɛ̈uken, ku dhɛ̈ŋken abï ke dhuööŋ kɔ̈ɔ̈th.

¹⁶ Këthiin nu tëde raan piɛthpiɔ̈u adik, awär kuɛth dïït nu tëde kɔc rac ëbɛ̈n,

¹⁷ në biäk bïï ë Bɛ̈nydït riɛl de kɔc rac dhoŋ kɔ̈u, ku abï kɔc piɛthpiɔ̈ɔ̈th kony.

¹⁸ Bɛ̈nydït ee kɔc cïn gup gääk gël, ku piny abï aa këden aɣet athɛɛr.

¹⁹ Acïkï bï nuan në akööl ke kërac, ku abïk nïïm dɛk kacaam akööl ke cɔk.

²⁰ Ku kɔc rac abïk thou, kɔc de ater në Bɛ̈nydït, dhuëëŋden abï riäär cït man ee gaak de wal roor ku mɛ̈ɛ̈rkï cït man ë tol.

²¹ Raan rac ee dhëën ku acie col, ku raan piɛthpiɔ̈u ee amiööc ee käŋ gam baaŋ.

²² Kɔc cïï Bɛ̈nydït thieei abïk piny lɔ̈ɔ̈k lak, ku kɔc cï ke cieen abïï ke cuɔp wei.

²³ Bɛ̈nydït ee piɔ̈u miɛt kekë kɔc ee kueerde kuany yic, ku gël kɔc ee yen miët piɔ̈u.

²⁴ Na cakaa kɔ̈thkï acïkï bï wïïk, në luɔi muk ë Bɛ̈nydït kecin.

²⁵ Yɛn aaye meth, ku ënɔɔnë yɛn cï dhiɔp, ku yɛn kën raan piɛthpiɔ̈u kɔn tïŋ ke cï päl wei, ku yɛn kën mïth ke raan piɛthpiɔ̈u tïŋ alip këcam.

²⁶ Ee kɔc miɔɔc baaŋ ku ee kɔc dhɛ̈ɛ̈n, ku mïthke ayek aa athiɛɛi.

²⁷ Päl luɔi de kërac, ku loi këpiɛth, ke yï bï pïïr anandu,

²⁸ në biäk nhiɛɛr ë Bɛ̈nydït yic, acïï kɔckɛn cï gam bï pɔ̈l. Kɔc piɛthpiɔ̈ɔ̈th abïk tɔ̈u athɛɛr, ku mïth ke kɔc rac abïï ke cuɔp wei.

²⁹ Kɔc piɛthpiɔ̈ɔ̈th abïk piny lɔ̈ɔ̈k lak, ku abïk rëër thïn aɣet athɛɛr.

³⁰ Thoŋ de raan piɛthpiɔ̈u ee jam në pɛlënɔm, ku liemde ee yic lueel.

³¹ Ayek jam ë Nhialicden döt në kepiɔ̈ɔ̈th, ku acïkï duëër kɔn puɔ̈l.

³² Kɔc rac ee raan piɛthpiɔ̈u woi, ku ayek kɔɔr bïk keek nɔ̈k.

³³ Ku aye Bɛ̈nydït ke gël ku cïï ke pɛ̈l keek, ku acïï keek bï tɔ mac të guiir ë luŋden.

³⁴ Ye Bɛ̈nydït ŋɔ̈ɔ̈th, ku ye lööŋke riëëu, abï yïn biɔɔl në piny, ka yïn bï kɔc ee karɛc looi tïŋ acopë wei.

³⁵ Yɛn cï raan rɛɛc ee kɔc kuur tïŋ, raan dïït cït kɔ̈u tim de thidar de Lebanɔn.

³⁶ Na ɣɔn ke go thou, ku cïï be tɔ̈u, na ɣɔn aa ya bɛ kɔɔr ke cä be yök taitai.

³⁷ Tak raan cïn guöp awäc, ku tïŋ raan piɛthpiɔ̈u, kɔc ee rëër ë mät abïk nïïm dɛk mïth bï lɔ̈ɔ̈k tɔ̈u në kecök,

³⁸ ku kɔc de gup awɛ̈ɛ̈c abï ke riɔ̈ɔ̈k taitai, ku mïthken abï ke nyaai nyïïn.

³⁹ Kuɔɔny de kɔc piɛthpiɔ̈ɔ̈th ee bɛ̈n tëde Bɛ̈nydït, ee Yen ee ke gël në akööl ke nuan.

⁴⁰ Aye ke kuɔny ku luɛ̈k keek, aye ke kony në kɔc rac, në luɔi ye kek lɔ tëde yen bïï ke gël.