Diɛt 36 - JAM DE NHIALIC 2011

Rac de Raan

¹ Awäc ee jam në raan rac piɔ̈u thïn ya, acïn riëëu de Bɛ̈nydït në kegup.

² Ayek röt yök apiɛth kapäc, ayek tak nɔn cïï Nhialic awänyden bï ŋic ku lui këtuc.

³ Jamden aa rac ëbɛ̈n ku athiäŋ ke tör, acïn këpiɛth ku këde pɛlënɔm yek bɛ looi.

⁴ Ee kiɛɛr rac yen yek tak ëbɛ̈n të cï kek tɔ̈c, ku acïn këpiɛth yek bɛ looi, ku acïn kërɛɛcdɛn yek bɛ rɛɛc.

Piath de Nhialic

⁵ Bɛ̈nydït nhiëërduön agɔk ee ɣet paannhial, piɔ̈nduön adöt ee ɣet nhial ë luätic.

⁶ Piathëpiɔ̈ndu acït kur ke Nhialic, ku Guiëër de yicdu acït lil ë wɛ̈ɛ̈r. Kɔc ayï läi atɔ̈ukï në Yïciin.

⁷ Nhialic, nhiëërduön agɔk apiɛth arëët! Yïn ee mïth ke kɔc gël në atïm de yïn wuök.

⁸ Wok ee dhuëëŋ looi në këcam dïït nu ɣöndu, yïn ee wook tɔ dëk në pïïu ke kiir de piathdu.

⁹ Ee yïn ee wook gäm awaŋ de pïïr, ku ɣɛɛrdu ee wook tɔ mit piɔ̈ɔ̈th në pïïric.

¹⁰ Ye nhiëërduön agɔk tɔ tɔ̈u kekë kɔc ŋic yïn, ku ye kuɔɔnydu tɔ̈u kekë kɔc lɔ piɔ̈ɔ̈th wai.

¹¹ Du ɛn tɔ mook ë piny ë kɔc ee kërac looi, ku du kɔc ke lɛc tɔ cop a wei.

¹² Kɔc ee karɛc looi acï ke tiaam, acïk nuan, ka cïkï kërac duëër bɛ nyɔk në luɔi.