Diɛt 35 - JAM DE NHIALIC 2011

Lɔ̈ŋ de Kuɔɔny

¹ Ye nɔm kɔc ee nïïm ɛn Bɛ̈nydït, thäärë wekë kɔc piɔ̈t në yɛn!

² Nöm köndu ku wëthkuön ke tɔŋ, ku bä luäk ɛn.

³ Nöm tɔŋdu ku yiëp, ku gëk kɔc cop ɛn nïïm. Ku nyuöthë yɛn nɔn bï yïn ɛn kony.

⁴ Yäär kɔc gup, kɔc kɔɔr aa näkkï yɛn! Tɔ kɔc kɔɔr an näkkï yɛn puk röt ku kɔtkï!

⁵ Tɔ ke cït miɛ̈l ee yom gɔp, të cop ë tunynhial ë Bɛ̈nydït keek!

⁶ Tɔ kueerden colic ku le rieethrieeth, ku jɔ tunynhial ë Bɛ̈nydït keek yuöp piny!

⁷ Në luɔi cï kek a deep ke cïn yic, ku wëckï ya pul ke cïn kë cä looi.

⁸ Tɔ ke mook ë riääk ëthiäu ke kuckï, tɔ ke dɔm ë wïïnkɛn ke dɛ̈p, ku tɔ ke wiɛ̈ɛ̈k në puölken yiic ku thoukï!

⁹ Ku ëtɛ̈ɛ̈n, yɛn bï piɔ̈u jɔ miɛt në Bɛ̈nydïtic, yɛn bï piɔ̈u jɔ miɛt të cï en a kony.

¹⁰ Ku abä ja lɛ̈k Bɛ̈nydït në yapiɔ̈u ëbɛ̈n an, “Acïn raan thöŋ ke yïn. Yïn ee raan kɔ̈c gël në raan ril ku gël raan kuany nyin në raan yɔŋ en.”

¹¹ Kɔc rac ayek ɛn cäk thok në lueth, ayek ɛn lɛ̈k guöp ka kuöc keek.

¹² Ayek këpiɛth cool nɔm në kërac, ku wäckï yapiɔ̈u.

¹³ Ku wään cï jɔk ke dɔm, acä ke dhiëëu ku ciɛŋ lupɔɔ ka acuɔl në këden, ku rɛɛc cäm, ku läŋ ke ya gut a nɔm piny,

¹⁴ yɛn ëbɛ̈n lɔ̈ŋ në biäkden cït kë laŋ në biäk de mäth ku nɔn yen wänmääth, Yɛn ee yanɔm bɛ̈n ee guöt piny ke ya dhiau cït ke dhiëëu maar.

¹⁵ Na wën aa yök këtuc ɛn, ke ke mit piɔ̈ɔ̈th kedhie, ku matkï kenïïm getki yɛn, agokï ya aa biɔ̈ɔ̈k ayï kɔc kuöc keek ayek ya dui.

¹⁶ Agokï ya aa geet guöp cït ka get aduany, ku kɛ̈ɛ̈ckï kecin në këdï ke ke cï ŋeeny.

¹⁷ Bä ee kënë jɔ woi Bɛ̈nydït agut cï nɛn? Luäk ɛn në keek, kony yɛn në ee kɔ̈ɔ̈rkë.

¹⁸ Ku yïn bä jɔ leec në akutnɔm de kɔcku nïïm, ku lɛɛc yïn në kenïïm kedhie.

¹⁹ Du ɛn tɔ dɔl ë kɔc ke aterdï guöp, acïk ɛn maan ke cïn kë cä looi. Du ke tɔ get ɛn guöp baaŋ acïnkï nïïm yic bï kek a maan.

²⁰ Acïkï ee jam apiɛth, ayek kɔc nhiaar mät ee pinynɔm cäk gup lueth juëc.

²¹ Ayek ɛn cäk thok luelkï an, “Kënë tïŋ, kë cï looi acuk tïŋ!”

²² Ku Yïn aa daai ë ceŋ Bɛ̈nydït. Du thok mim. Du ɛn pɛ̈l wei yatök Bɛ̈nydït.

²³ Bä gël ɛn! Biök tɔŋdï Bɛ̈nydït Nhialicdï.

²⁴ Kony yɛn, Bɛ̈nydït Nhialicdï, në biäk de piathëpiɔ̈ndu, ku du keek tɔ dɔl ɛn guöp!

²⁵ Du bï tɔ luelkï an, “Acuk jɔ nyaai! Kë kɔɔrku acuk jɔ yök.”

²⁶ Yäär ke gup ku tɔ ke nuan, në luɔi ë cï kek piɔ̈ɔ̈th miɛt në kërɛɛc cï ya yök. Yäär keek abïk gup riɔ̈ɔ̈c, në luɔi ye kek ye lueel an, wärkï yɛn në piath.

²⁷ Tɔ määthkï kït në miɛtëpiɔ̈u. Tɔ ke lec yïnɔm ananden an, “Bɛ̈nydït aa dhuɛ̈ŋ, ee piɔ̈u miɛt të cïï kɔcke tiam.”

²⁸ Ku liemdï abï kake piathëpiɔ̈ndu luɛɛl, ku Yïn bä ya leec aköölnyïïn ëbɛ̈n.