Diɛt 34 - JAM DE NHIALIC 2011

Piɔ̈ny de Piath ë Nhialic

¹ Yɛn bï Bɛ̈nydït aa thieei aköölnyïïn ëbɛ̈n, lɛcde abï tɔ̈u ë yathok ë ceŋ.

² Abä piɔɔny në biäk de kë cï looi, piɛŋkï wedhie wek kɔc cï yɔŋ ku miɛtkï piɔ̈ɔ̈th!

³ Luɛɛlkï dït de Bɛ̈nydït në yɛn ëtök, piɔnyku rinke ëtök!

⁴ Yɛn cï Bɛ̈nydït lɔ̈ŋ, ago këdï bɛ̈ɛ̈r, ku kony ɛn në kën ee ya riääc ëbɛ̈n.

⁵ Kɔc yɔŋ ayek lɔ tëde Bɛ̈nydït gokï piɔ̈ɔ̈th miɛt, acïkï bï kɔn yäär.

⁶ Raan kuany nyin ee Bɛ̈nydït cɔɔl, go Bɛ̈nydït këde bɛ̈ɛ̈r, ku kony në këriëëcdɛn cï ye nuaan ëbɛ̈n.

⁷ tunynhial ë Bɛ̈nydït ee kɔc ee Nhialic riëëu gɛɛu cil, ku kony keek në kë dhal keek.

⁸ Them tei, ku tïŋ luɔi piɛth de Bɛ̈nydït. Thieithieei në raan ye Bɛ̈nydït gël.

⁹ Riëëukï Bɛ̈nydït guöp wek kɔcke, kɔc ee ye riëëu abïk këriëëc kɔɔrkï yök ëbɛ̈n.

¹⁰ Kɔ̈ɔ̈r aye cɔk ke nɔ̈k, ku raan ëbɛ̈n, raan ee Bɛ̈nydït riëëu, acïn këdɛn ee dak.

¹¹ Bäkkï mïth, bäk piɛŋkï kë luɛɛl, wek bä nyuöth riëëu ye Bɛ̈nydït riëëu.

¹² Na de raan kɔɔr pïïr de miɛtëpiɔ̈u ë weyiic? De raan kɔɔr bï pïïr ë run juëc ke mitpiɔ̈u?

¹³ Ke tit yethok në tör ku luɛɛl ë kërac.

¹⁴ Päl kërac ku loi këpiɛth, ye mät kɔɔr në piɔ̈ndu ëbɛ̈n.

¹⁵ Nyïïn ke Bɛ̈nydït awoikï kɔc piɛthpiɔ̈ɔ̈th, ku yïthke apiŋkï dhiënden,

¹⁶ ku Bɛ̈nydït ee Yenɔm wɛ̈l kɔc ee kërac looi, ago ciɛ̈n raan bï ke bɛ tak ë piny nɔm, të cï kek thou.

¹⁷ Të cïï kɔc piɛthpiɔ̈ɔ̈th dhiau në Bɛ̈nydït nɔm ke ke kɔɔr kuɔɔny, aye Bɛ̈nydït piŋ, ku luɛ̈k keek bei në nuan cï keek yök yic.

¹⁸ Bɛ̈nydït ee tɔ̈u tëthiɔ̈k kekë kɔc cï piɔ̈ɔ̈th dhuɔɔŋ, ee kɔc cï ciɛ̈n aŋäth kony.

¹⁹ Kɔc piɛthpiɔ̈ɔ̈th aye nuɛɛn juëc ke yök, ku aye Bɛ̈nydït ke kony në keek kedhie.

²⁰ Aye Bɛ̈nydït ke döt apiɛth, na cakaa yuɔɔm tök në yomken yiic acïï duëër dhuɔɔŋ.

²¹ Kɔc rac abïï racden ke nɔ̈k, kɔc man kɔc piɛthpiɔ̈ɔ̈th abïk këtuc yök.

²² Bɛ̈nydït ee kɔcke kony, acïn raan töŋ bï këtuc yök në kɔc ee yen ŋɔ̈ɔ̈th.