Diɛt 28 - JAM DE NHIALIC 2011

Lɔ̈ŋ de Kuɔɔny

¹ Ee Yïn acaal Bɛ̈nydït, Raan riil ee ya gël. Piŋ dhiëndï! Na cïï lɔ bɛ̈ɛ̈r, yɛn bï nu në kɔc cï lɔ paan ë thuɔɔu.

² Piŋ lɔ̈ŋdï, të dhiëëu ɛn kuɔɔny, të yan yacin jat nhial të lɔ tëduön ɣeric.

³ Du ɛn lui këtuc wo kɔc rac, kɔc ee karɛc looi, ayek këpiɛth lueel ë kethook, ku thiëŋkï piɔ̈ɔ̈th në män.

⁴ Luöiyë keek këtuc në biäk de kë cïk looi, në biäk de awäny cïk looi. Luöiyë keek këtuc në biäk de ka cïk looi ëbɛ̈n, gämë keek kë rɔ̈ŋ ke keek!

⁵ Në luɔi cïn kek këdenic thïn në kë looi ë Bɛ̈nydït, ku cïnkï këdenic thïn në kë cï cak, abï Bɛ̈nydït ke luöi këtuc ku riëëk keek aɣet athɛɛr.

⁶ Pianykï Bɛ̈nydït, acï dhiëndiën kaar ɛn kuɔɔny piŋ.

⁷ Bɛ̈nydït yen aye riɛldï ku ye köndï, aŋääth në yapiɔ̈u. Ee yɛn kony ku tɔ yɛn mit piɔ̈u, aya piɔɔny në diɛt ke miɛtëpiɔ̈u.

⁸ Bɛ̈nydït ee riɛl de kɔcke. Ee melikdɛn cï lɔc gël.

⁹ Kony kɔcku Bɛ̈nydït, ku thiei ka wën ee kaku. Tɔ rɔt ee tïnden, ku tit keek aɣet athɛɛr.