Diɛt 27 - JAM DE NHIALIC 2011

Lɔ̈ŋ de Piɔ̈ny

¹ Bɛ̈nydït ee ɣɛɛrdï ku ee konydï, acïn raan duɛ̈ɛ̈r ɛn bɛ riɔ̈ɔ̈c. Bɛ̈nydït yen aye yɛn gël ë kërac ëbɛ̈n, yɛn cïï bï kɔn riɔ̈ɔ̈c.

² Të cïï kɔc rac yɛn mak, akɔɔrkï bïk a nɔ̈k, abïk kɔ̈th ku wïïkkï.

³ Na cakaa cï rem dïït de tɔŋ a gɛɛu cil, yɛn cïï bï riɔ̈ɔ̈c, na cak kɔc ke ater yɛn mak, yɛn bï ŋoot ke ya ŋäth Nhialic.

⁴ Ee tök yen aa liɛm tëde Bɛ̈nydït, ee tök tei yen akaar: ee luɔi bän rëër ë Luaŋdït yic, në akööl ke pïïrdï yic ëbɛ̈n, bä kake piathde aa woi ëtɛ̈ɛ̈n, ku bä luɔi bï yen a wat aa kɔɔr.

⁵ Në akööl ke nuan abï yɛn aa thiaan, abï yɛn gël ɣönde ku kony ɛn në kuur bäär nɔm.

⁶ Ka yɛn bï kɔc de wok ater nu ë yalɔ̈ɔ̈m tiaam. Në diɛt ke miɛtëpiɔ̈u yɛn bï miɔ̈c gam ɣönde, yɛn bï ket, yɛn bï Bɛ̈nydït piɔɔny.

⁷ Ye ya piŋ röl Bɛ̈nydït të caal ɛn yïn! Kokëpiɔ̈u we yɛn ku bɛ̈ɛ̈rë këdï!

⁸ Acï lueel an, “Bä lam ɛn,” Aguɔ bɛ̈ɛ̈r an, “Yɛn bï bɛ̈n, Bɛ̈nydït”

⁹ du rɔt thian në yɛn, du awundu pɛ̈l wei. Yïn aaye konydï, du ya nyiëëŋ piny, du ya päl, Nhialic, konydï.

¹⁰ Na cak wäär kekë maar a nyääŋ piny, ke Bɛ̈nydït abï yɛn muk.

¹¹ Wɛ̈ɛ̈t ë yɛn Bɛ̈nydït në kueerdu, ku tɛ̈ɛ̈kë yɛn në kueer piɛthic, në biäk de yɛn nɔm kɔc ke ater juëc.

¹² Du yɛn pɛ̈l ë kɔc ke aterdï cin, kɔc ee yɛn mak në lueth ku akuöörkuöör.

¹³ Aŋiɛc ë gɔk nɔn bän pïïr, aguɔ piath ë Bɛ̈nydït kɔn tïŋ, në ee pinyë nɔm.

¹⁴ Tit kuɔɔny de Bɛ̈nydït. Rit yïpiɔ̈u ku tɔ rɔt ril, ku tit kuɔɔny de Bɛ̈nydït.