Diɛt 26 - JAM DE NHIALIC 2011

Lɔ̈ŋ de Raan Piɛth

¹ Bɛ̈nydït tɔ yɛn ee raan piɛth, në biäk yan këpiɛth looi, ku ŋääth Yïn ë piɔ̈ndï ëbɛ̈n.

² Them ɛn apiɛth Bɛ̈nydït, caar yapiɔ̈u ku them täŋdï.

³ Në luɔi ye nhiëërduön agɔk ya wat, ku piɔ̈nduön adöt ee ya caath, yɛn rɛ̈ɛ̈r ë riëëudu yic ë ceŋ.

⁴ Yɛn cie rëër wo kɔc rac, ku cä mät wo kɔc de yiic aguuk.

⁵ Yɛn man kuut de kɔc ee karɛc looi, ku rɛɛc kɔc rac.

⁶ Bɛ̈nydït yɛn ë yacin waak bän luɔi ciɛ̈n ɛn guöp awäc nyuɔɔth, ku la lam ë yïïŋdu lɔ̈ɔ̈m.

⁷ Yɛn ee din de thieithieei kiit ku luɛɛl kakuön ke gäi cï looi.

⁸ Yɛn nhiaar rëër ë Luaŋdïtic, të ye dhuëëŋdu tɔ̈u thïn.

⁹ Du ɛn näk wokë kɔc de gup awɛ̈ɛ̈c, luäk wëikï tëde kɔc ee kɔc nɔ̈k,

¹⁰ kɔc ee karɛc looi ë ceŋ ku cïk cïn thiäŋ në kum thok.

¹¹ Na yɛn, yɛn ee këpiɛth looi, kokëpiɔ̈u we yɛn ku kony ɛn!

¹² Yɛn cï luök në riääkic ëbɛ̈n, yɛn bï Bɛ̈nydït thieei në akutnɔm de kɔcke nïïm.