Diɛt 22 - JAM DE NHIALIC 2011

Din de Dhiënëpiɔ̈u ku Piɔ̈ny ë Miɛtëpiɔ̈u

¹ Nhialicdï, Nhialicdï, eeŋö pɛ̈l yïn ɛn? Yïn cä cɔɔl në dhiënëpiɔ̈u an luäk ɛn ku Yïn kën bɛ̈n.

² Yïn cä cɔɔl aköl Nhialicdï, ku Yïn kën cɔ̈tdï puk nɔm. Yïn cä cɔɔl wakɔ̈u, ku acïn kë cï puɔ̈k nɔm ɛn.

³ Ku ee Yïn anu në thööc nɔm ke Yï ye raan töŋ ɣeric, Raan töŋ ye kɔc ke Yithriɛl piɔɔny.

⁴ Kuarkuɔ acïk aŋäthden tääu ë Yïguöp, aŋäthkï yïn, ku acï ke kony.

⁵ Ayek yïn cɔɔl agokï poth në kërac yic, acïk yïn ŋɔ̈ɔ̈th ku akɛ̈n ë keek bɛ̈n yɔ̈ɔ̈r gup.

⁶ Na yɛn, yɛn cïï be aa raan, yɛn ee kɔ̈m, ye raan ëbɛ̈n biɔɔn guöp, ku dhäl ɛn!

⁷ Kɔc ee yɛn tïŋ ayek en geet guöp. Ayek keliëp läŋ bei ku betkï kenïïm.

⁸ Ayek lɛ̈k ɛn an, “Puɔ̈kë rɔt Bɛ̈nydït, na de të bï en ye kony. Na nhiaar Bɛ̈nydït yïn eeŋö cï Yen yï luök?”

⁹ Ee yïn ë tɔ ya dhiëëth ë maar, ku muk ɛn apiɛth wään yan mɛnh thiinakäŋ.

¹⁰ Ku yɛn ë rɔt kan në yïn ë cieŋ ë dhiëëth ë ya, ku yïn aye Nhialicdï ë ceŋ ë dhiëëth ë ya.

¹¹ Ka yïn du rɔt tɔ mec we yɛn! Nuɛɛn acïk juëc, ku acïn raan kony ɛn.

¹² Kɔc ke ater juëc acïk ɛn gɛɛu cil cït man ë thön, Acïk ɛn gɛɛu cil ëbɛ̈n, cït man ë thön ke Bacan.

¹³ Acïk kethook liëp ɛn cït man ë kɔ̈ɔ̈r cïï cɔk nɔ̈k ee kïïu.

¹⁴ Riɛldï acï thök, cït pïïu cï piaak piny. Yomkï kedhie acïk nyïïn lääu, Piɔ̈ndï acï lɛ̈ɛ̈ŋ cï man ë pïïu.

¹⁵ Riɛldï ë koth cï tööny ë tiɔp, ku nuɛt liemdï rɔt ë dai yic nhial. Yïn cï ya nyääŋ piny në abuui de thuɔɔuwic.

¹⁶ Kɔc rac acïk ɛn gɛɛu cil, acïk ɛn biɔ̈u cï man ë jɔ̈k, acïk ɛn kac cök ku kackï yacin.

¹⁷ Yomkï atïckï biic kedhie, kɔc ke aterdï ayek ɛn woi ë nyin thar.

¹⁸ Acïk lupɔɔkï tɛ̈k röt, ku deenykï gɛk tëk kek röt lupɔɔkï.

¹⁹ Bɛ̈nydït du rɔt tɔ mec we yɛn! Yïn aye riɛldï, dap ɛn kony.

²⁰ Kony a wëi në abätäu, kony a wëi në riɛl ë jɔ̈k.

²¹ Kony yɛn në kɔ̈ɔ̈r thook, yɛn ë ciën kony. Yïn cï lɔ̈ŋdï bɛ̈ɛ̈r, luäk ɛn në tuŋ ke thön.

²² Ku ëtɛ̈ɛ̈n, këdu abä ja lɛ̈k kɔc ke Yithriɛl. Ku yïn bä leec në akutnɔm yic.

²³ Lɛckï Bɛ̈nydït wek awuut ke Bɛ̈nydït! Riëëukï guöp wedhie wek kuat de Jakop! Yak lam wek kɔc ke Yithriɛl wedhie.

²⁴ Acïï kɔc kuanynyïïn ee päl wei, Acïï rɔt ee thiaan në keek, aye ke piŋ thook të cɔɔl kek en.

²⁵ Bɛ̈nydït yïn bä leec në akutnɔm de kɔcku nïïm ë biäk de kë cï looi, në kɔc ee yïn lɔ̈ŋ nïïm yɛn bï miɔ̈c näk cän gutguut lueel gäm yïn.

²⁶ Kɔc kuanynyïïn abïk cam abïk kuɛth, ku kɔc ee Bɛ̈nydït ŋɔ̈ɔ̈th abïk Bɛ̈nydït leec. Piɔ̈ndu abï tɔ̈u aɣet athɛɛr.

²⁷ Kɔc ke piny thar ëbɛ̈n abïk kenïïm tak ku bekï röt puɔ̈k Bɛ̈nydït. Juöör kedhie abïk Bɛ̈nydït bɛ lam.

²⁸ Bɛ̈nydït ee melik, ka ee yen ee bɛ̈ny de juöör.

²⁹ Kɔc ril ke pinynɔm abïk cam ku abïk kenïïm guöt piny ë yenɔm, mɛnh ë raan abï yenɔm guöt piny ë yenɔm.

³⁰ Kɔc kedhie abïk Bɛ̈nydït luööi wadäŋ, ku abïk rɛm bï bɛ̈n aa guiëër kake Bɛ̈nydït.

³¹ Kɔc ŋoot ke ke kënë dhiëëth abïk kë cïï Nhialic looi piŋ an: “Bɛ̈nydït ee kɔcke kony.”