Diɛt 2 - JAM DE NHIALIC 2011

Melik cïï Nhialic Lɔc

¹ Eeŋö ee juöör tɔ loi kiɛɛr rac? Eeŋö ee kɔc tɔ loi ee täŋdɛn cïn naamden aya?

² Meliik ke piny acïk kenïïm mat, bäny acïk kethook mat, bïk ater wɛ̈l nɔm Bɛ̈nydït kekë raandɛn cï tɔc.

³ Ku luelkï an, “Nömku nɔm lääu ku nyiɛɛiku röt në ciɛɛŋden yic, ciɛɛŋdɛn cieŋ kek wook.”

⁴ Go Bɛ̈nydït dɔl paannhial në thönyde nɔm, ke geet ɣääriicken.

⁵ Ku acï keek jɔ̈ɔ̈ny ke cï ŋeeny, riëëc keek në agɔ̈th.

⁶ Ku lueel an, “Yɛn ë meliŋdï kuany në Dhiɔn nɔm, kuurdiën ɣeric.”

⁷ Ku lueel ë melik an, “Yɛn bï kë cïï Bɛ̈nydït lueel aa caal, acï lɛ̈k ɛn an, ‘Yïn ee wëndï, ku ee köölë Yɛn cï aa Wuur.

⁸ Thiëc Ɛn, ku yïn bä gäm juöör ëbɛ̈n, ku piny thar ëbɛ̈n abï aa këdu.

⁹ Abä keek dhuööŋ në thieny ë wëëth, abä ke dhuɔŋ piny cït man ë töny ë tiɔp.”’

¹⁰ Ku ënɔɔnë piɛŋkï ee yöökë, wek meliik, takï wenïïm pel wek bäny ke pinynɔm,

¹¹ Luööikï Bɛ̈nydït në riɔ̈ɔ̈c. Yak röt tɔ lɛthë

¹² ku guötkï wenïïm piny në yenɔm. Ku na cie yen, ke agönhde abï rɔt dap looi, ka wek bï dap thou ëthiäu. Thieithieei në kɔc ee lɔ tëde Yen le ke gël.