Diɛt 19 - JAM DE NHIALIC 2011

Dhuëëŋ de Nhialic në Cäkic

¹ Paannhial anyooth dhuëëŋ de Bɛ̈nydït, ku gëlgël aguiir kë cïï ë Bɛ̈nydït looi.

² Aye köölë nyuöth kööldäŋ bɔ̈yë, ku wakɔ̈u ee wakɔ̈u däŋë bɛ nyɔkic.

³ Acïkï ee jam acïnkï wël, acïn röl ye piŋ.

⁴ Ku kë luelkï aye piŋ ë pinynɔm ëbɛ̈n, jamden ee piny guut thar. Nhialic acï tënhial looi ke ye paan de akɔ̈l,

⁵ akɔ̈l ee bɛ̈n bei cït man ë monythiëk bɔ̈ bei ɣöndɛn ë nïn, ee tɔ̈u ë ŋekŋek cï man ee raan ee thuëëc kɔɔr nɔn bï en wuöör ke kɔc.

⁶ Akɔ̈l ee thok bɛ̈n ë baŋ tök, ku kuɛny kueerde yic agut të bï ɛn lɔ piny ë baŋ däŋë. Ee këriëëc ëbɛ̈n nyɔ̈ɔ̈r në atunyde.

Löŋ de Bɛ̈nydït

⁷ Löŋ de Bɛ̈nydït acï dikëdik, ee kɔc kɔ̈c bɛ tɔ ril. Yöök de Bɛ̈nydït alɔ gɔk, ee kɔc cïn nïïm tɔ pel nïïm.

⁸ Lööŋ ke Bɛ̈nydït ayek yic, ayek kɔc ee ke gam tɔ mit piɔ̈ɔ̈th. Yöök de Bɛ̈nydït alek wai, ayek kɔc gäm yöŋ de käŋ yiic.

⁹ Rïïu ye Bɛ̈nydït riëëu adik, abï tɔ̈u aɣet athɛɛr. Guiëër ye Bɛ̈nydït löŋ guiir ee yic, ayek yic tiiŋ nɔm ë ceŋ.

¹⁰ Anhiaar keek awär adhäm awai, amitkï awär miök de kiëc cï leec.

¹¹ Ayek ɛn tɔ ŋic käŋ, yɛn awundu, yɛn ye thieei në biäk cän keek döt.

¹² Acïn raan aa awänyde tïŋ, Kony ɛn Bɛ̈nydït, në awäny cä looi ke kuöc!

¹³ Gël ɛn në awäny de kuöc luɔi, du awɛ̈ɛ̈c tɔ ceŋ awundu. Yen abän aa raan cïn guöp gääk ku ciɛ̈n guöp awänydït.

¹⁴ Gam jamdï kekë täŋdï, Bɛ̈nydït, gëlgëldï, ku konydï!