Diɛt 18 - JAM DE NHIALIC 2011

Din de Tiëm ë Debid

¹ Yïn nhiaar Bɛ̈nydït, Yïn ee riɛldï.

² Bɛ̈nydït yen aye kuurdï, Yen aye ya gël, ku raan ee yɛn luök, ku ye Nhialicdï, ku kuurdiën de thiaan. Ku Nhialic ee köndï, ku ye tuuŋ de kuɔɔnydï, ku ye tëdiën de riɛl.

³ Yɛn ee Bɛ̈nydït cɔɔl, ago ya kony në kɔc ke aterdï. Lɛckï Bɛ̈nydït!

⁴ Thuɔɔu acï ya tuɔɔk, ku apiöŋ de riääk acï ya kum nɔm.

⁵ Yɛn cï duöt në wïïn ke paan ë thuɔɔu, ku wïn ë dɛ̈p de thuɔɔu anu në yanɔm tueŋ.

⁶ Aguɔ Bɛ̈nydït cɔɔl në jiɛthëpiɔ̈u, ku caal Nhialicdï bï ya kony. Ago ya piŋ röl luaŋde, ku piŋ dhiëndiën kaar ɛn kuɔɔny.

⁷ Ago piny rɔt nieeŋ ku lɛthë, ku lɛthë këërkëër ke kur ku kuemkï röt, në luɔi cï Bɛ̈nydït piɔ̈u diu.

⁸ Ago tol lɔ nhial në yewum, ku atiam de many dɛ̈p ë yethok ku bɔ̈ many ee biɔ̈l bei në yeguöp.

⁹ Ago paannhial reetic, ku bïï piny ke mɔ̈ɔ̈thdïït lɔ dïu në yecök.

¹⁰ Ee kɛɛc ë cerubiim kɔ̈u ku pɛ̈ɛ̈r, ee cath në wuök ke yom kɔ̈ɔ̈th.

¹¹ Ago rɔt kum në mɔ̈ɔ̈th, de luändïït col, luän cï thiäŋ ke pïïu cï E gɛɛu cil.

¹² Ago deŋ kɔi, ku riau de mac aa bɛ̈n bei në wilëdeŋ nu ë yenɔm ku tëëk ë mɔ̈ɔ̈th de luätic.

¹³ Ago Bɛ̈nydït rel paannhial, abïï röl de Awärjäŋ piŋ.

¹⁴ Ago dhaŋde moc, go kɔc de ater në yen thiäi piny, ku cop keek në wilëdeŋ.

¹⁵ Ago lil de Abäpdit thar tïc, ku tiëc këërkëër de piny, të cï Bɛ̈nydït kɔc ke aterde rël yiic, ku të cï yen ke ŋɛ̈ny në agɔ̈th.

¹⁶ Ago Bɛ̈nydït ɣeet piny ku dɔm ɛn, ku mïït ɛn bei në pïïuwiic piny.

¹⁷ Ago ya luäk bei në kɔc ril ke aterdï, ku luɛ̈k ɛn në kɔc man ɛn kedhie, në luɔidɛn ë ril kek awär ɛn.

¹⁸ Aake mook ɛn në nuanic, ago Bɛ̈nydït ya gël.

¹⁹ Aa luɛ̈k a bei në këtuc thok, aa kony ɛn në luɔi mit en piɔ̈u ke yɛn.

²⁰ Bɛ̈nydït aa thiei ɛn në kë rɔ̈ŋ ke piathëpiɔ̈ndï, aa thiei ɛn në biäk cïn en kë cä wööc.

²¹ Yɛn cï lööŋ ke Bɛ̈nydït döt, yɛn kën a kɔ̈u wɛ̈l Nhialicdï.

²² Lööŋke kedhie acä ke döt, acïn löŋdɛn cä dhɔ̈ŋic.

²³ Aŋic ɛn nɔn ciën ɛn guöp gääk, aŋic nɔn cän rɔt tiit në awäc.

²⁴ Ago Bɛ̈nydït ya cuööt në kë rɔ̈ŋ ke piathëpiɔ̈ndï, aa ŋic nɔn ciɛ̈n ɛn guöp awäc.

²⁵ Bɛ̈nydït Yïn aa adöt në biäk de kɔc adööt tëde Yïn, Yïn piɛth arëët wekë kɔc piɛth.

²⁶ Yïn awai wekë kɔc awai, ku yïn man kɔc rac.

²⁷ Yïn ee kɔc cï röt kuɔɔr piny kony, ku Ye kɔc ee röt lɛɛc kuɔɔr piny.

²⁸ Bɛ̈nydït, gämë yɛn ɣɛɛr, ku cop mɔ̈ɔ̈th në yalɔ̈ɔ̈m.

²⁹ Yïn ee ya gäm riɛl bän kɔc ke aterdï mak ku riɛl tiaam ɛn keek.

³⁰ Kuɛɛr ke Nhialicë acïk dikëdik! Ku jamde alɔ gɔk! Bɛ̈nydït ee kön de kɔc gam en.

³¹ Bɛ̈nydït Yetök yen aye Nhialic, Ee yen Yetök yen aye wo kony.

³² Nhialic ee yɛn gël në riɛl, ku tɔ kueerdï piathic.

³³ Ee ya gël cök cït man ë ŋɛɛr ke ya cï bï kɔ̈th, ee ya gël në kur nïïm.

³⁴ Ee ya wɛ̈ɛ̈t ë tɔŋ, ke ya bï dhaŋ de maläŋ lëu në muc.

³⁵ Yïn cï yɛn gäm kön de kuɔɔnydu, ku ciin cuënydu ee yɛn muk, ku kuɔɔnyduön piɛth ee yɛn tɔ dït.

³⁶ Yïn ee ya gël ka yɛn kënë peec, ku yɛn kën kɔn wïïk.

³⁷ Yɛn ee kɔc ke aterdï cop ku damke, yɛn cie kɔ̈ɔ̈c të kën ɛn ke riɔ̈ɔ̈k.

³⁸ Aya ke duöi piny ka acïkï röt ee bɛ lëu në jöt, ayek wïïk ke ke cï tiaam në yanɔm.

³⁹ Yïn ee yɛn gäm riɛl de tɔŋ, ku tɔ ya tiam kɔc ke aterdï.

⁴⁰ Yïn ee kɔc ke aterdï tɔ kɔt në yɛn, ku riääk kɔc man ɛn.

⁴¹ Ayek kuɔɔny lip, ku acïn raan ee këden piŋ ayek Bɛ̈nydït cɔɔl, ku Bɛ̈nydït acïï cɔ̈tden ee puk nɔm.

⁴² Yɛn ee kɔc de wok ater mot, ka cïk ciët abuui ye yom gap nhial. Yɛn ee cath në kekɔ̈ɔ̈th cït man ye raan cath ë tiɔp nɔm kueer.

⁴³ Yïn ee ya luäk bei në kɔc rac cin ku tɔ yɛn ee bɛ̈ny de juöör, ka kɔc kuöc keek aluuikï yɛn.

⁴⁴ Kɔc lei ayek kenïïm guöt piny në yanɔm, ku të cï kek ya piŋ, ayek këdï gam.

⁴⁵ Ayek riɔ̈ɔ̈c në yɛn, ka aye ke lath tëdɛn cï kek thiaan thïn.

⁴⁶ Bɛ̈nydït apïïr! Pianykï Raan ë ya gël! Luɛɛlkï dït de Nhialic raan ë kony ɛn.

⁴⁷ Bɛ̈nydït ee ya tɔ tiam kɔc ke aterdï, ku ee ya tɔ ye bɛ̈ny de juöör.

⁴⁸ Ee ya kony në kɔc de wok ater. Ku tɔ ya ee bɛ̈ny de kɔc man ɛn. Yïn ee ya kony në kɔc ke akuöörkuöör.

⁴⁹ Ku yïn bä piɔɔny Bɛ̈nydït, në juöör yiic. Yïn bä piɔɔny në dit.

⁵⁰ Tiëmdït acï gäm melikde, ku nyooth nhiëërdɛn agɔk raandɛn cï tɔc, nyuth Debid ke kuatde aɣet athɛɛr.