Diɛt 147 - JAM DE NHIALIC 2011

Pianykï Nhialic Awärjäŋ

¹ Lɛckï Bɛ̈nydït! Ee këpiɛth buk Nhialinyda aa piɔɔny ë diɛt, ee këde miɛtëpiɔ̈u ku ee yic buk aa piɔɔny.

² Bɛ̈nydït acï wo bɛ gäm Jeruthalem, abïï kɔckɛn wään cï peec ciëën.

³ Ee kɔc cï piɔ̈ɔ̈th jiɛth tɔ piɔl gup ku duut bɔ̈ɔ̈tken nyïïn.

⁴ Acï kuën de kuɛl ŋic ku ye ke cɔɔl ë rinken kedhie.

⁵ Adït ku Awärjäŋ yen Bɛ̈nydïïtda pɛlënɔmde acïï duëërë them.

⁶ Ee kɔc cï röt kuɔɔr piny jat nhial, ku dum kɔc rac yiic piny.

⁷ Kɛ̈tkï Bɛ̈nydït diɛt ke thieithieei, guötkï diɛt ke thom Nhialicda.

⁸ Ee luät thiäi piny nhial, ku miɔc pinynɔm ë deŋ, ku tɔ wal tɔ cil ë kur nïïm.

⁹ Ee läi roor gäm kacaamken, ku ciëëm mïth ke diɛt të cï kek dhiau në cɔk.

¹⁰ Miɛtëpiɔ̈nde acie tɔ̈u kekë jöŋgöör ril, ku acie tɔ̈u kekë jööt ke tɔŋ,

¹¹ ee piɔ̈u miɛt kekë kɔc ee yen riëëu, kɔc ee nhiëërdɛn agɔk ŋɔ̈ɔ̈th.

¹² Yïn Jeruthalem lec Bɛ̈nydït! Lec Nhialicdu yïn Dhiɔn!

¹³ Ee kɛ̈lku tiit thook aril, Ee kɔckun thieei.

¹⁴ Ee Yen akɛɛthkun gël bïk tɔ̈u ke cïn riɔ̈ɔ̈c, ku tɔ week kueth në agamɔ piɛth.

¹⁵ Acï pinynɔm yɔ̈ɔ̈k, ago kë cï lueel dap looi.

¹⁶ Ee pïïu cï rɔ̈k thiɛth piny cï lupɔ, ku thiɛ̈i ruu cï abuui.

¹⁷ Ee deŋ kɔi tuɔɔc ë pinynɔm, acïn raan duëër liɛɛrdɛn ye tuööc lëu ë guöm!

¹⁸ Ee löŋde tuööc, go pïïu cï rɔ̈k lɛ̈ɛ̈ŋ, ee yomde tɔ put, go pïïu wat.

¹⁹ Ee jamde lɛ̈k Jakop, ku lëk guiɛɛrde ku lööŋke Yithriɛl.

²⁰ Akën ee kënë kɔn luöi juöör kɔ̈k, akuckï lööŋke. Lɛckï Bɛ̈nydït!