Diɛt 145 - JAM DE NHIALIC 2011

Diɛt ke piɔ̈ny

¹ Yɛn bï dïtdu aa thieei Nhialinydï ku ë meliŋdï, Yïn bä leec aɣet athɛɛr ku athɛɛr.

² Akööl yiic ëbɛ̈n Yïn bä aa leec. Yïn bä aa thieei aɣet athɛɛr ku athɛɛr.

³ Bɛ̈nydït adït, ku abï dhil aa piɔɔny aläl, ku dïtde acïï duëërë yök yic.

⁴ Kë cï looi abïï aa leec ë rem tɔ̈u ënɔɔnë ayï rɛm bï lɔ̈ɔ̈k bɛ̈n, abïk kadït cï looi aa luɛɛl.

⁵ Abïk aa jam ë dhuëëŋdu ku Bäänydu, ku abïk aa jam ë biäk de kapiɛth cï looi.

⁶ Kɔc abïk aa jam ë biäk de kadït cï looi, ku abïk dïtdu luɛɛl.

⁷ Abïk aa jam ë biäk de piathdu ku ketkï diɛt ke piathëpiɔ̈ndu.

⁸ Bɛ̈nydït ee nhiëër ku ee piɔ̈u kok, acie dap gɔ̈th ku nhiëërdɛn agɔk adït.

⁹ Apiɛth kekë raan ëbɛ̈n ku ee piɔ̈u kok kekë ka cï cak kedhie.

¹⁰ Bɛ̈nydït, kakuön cï cak kedhie, abïk yïn aa thieei, ku kɔcku kedhie abïk yïn aa leec.

¹¹ Abï aa jam në biäk riɛl ë bäänydu ku jamkï ë biäk de riɛlduön dït,

¹² ago raan ëbɛ̈n kakuön cï looi ŋic ku dhuëëŋ ë bääny de ciɛɛŋdu.

¹³ Ciɛɛŋdu ee ciɛɛŋ tɔ̈u athɛɛr, ku yïn ee melik aɣet athɛɛr. Bɛ̈nydït adöt në gutguutde yic ëbɛ̈n, ku ee piɔ̈u kok në luɔide yic ëbɛ̈n.

¹⁴ Ee kɔc tɔ̈u ë nuanic kony, ee kɔc cï wïïk jat nhial.

¹⁵ Kapïr kedhie ayek yïn woi në aŋäth, ku aye keek miɔɔc ë këcam të kɔɔr kek en.

¹⁶ Aye ke gäm kajuëc kɔɔrkï ku tɔ ke kueth kedhie.

¹⁷ Bɛ̈nydït apiɛthpiɔ̈u në ka ye looi yiic ëbɛ̈n, ee piɔ̈u kok ë ka looi keek kedhie.

¹⁸ Athiɔ̈k ke kɔc ee ye cɔɔl, kɔc ee yen cɔɔl ë piɔ̈nden ëbɛ̈n.

¹⁹ Ee kɔc ee yen riëëu gäm ka kɔɔrkï, ee dhiënden piŋ ku kony keek.

²⁰ Ee raan ëbɛ̈n raan nhiaar en gël, ku abï kɔc rac riɔ̈ɔ̈k.

²¹ Yɛn bï Bɛ̈nydït aa leec ë ceŋ, tɔ ka cï cak kedhie thieei rinkɛn ɣeriic aɣet athɛɛr.