Diɛt 144 - JAM DE NHIALIC 2011

Melik Alec Nhialic në Biäk de Tiëm

¹ Pianykï Bɛ̈nydït, raan ee ya gël! Acï yɛn wɛ̈ɛ̈t ë tɔŋ ku guiir ɛn ë biäk de tɔŋ.

² Yen ee köndï ku gëlgëldï, nhiëërdɛn agɔk, ee ya kony, aŋääth bïï ya luök. Ee juöör tiaam ë yacök.

³ Bɛ̈nydït, raan eeŋö, kë yïn diɛɛr ë këde? Mɛnh ë raan tei, yen duëër yïn këde tak?

⁴ Acït awuööu de yom, nïnke acïtkï atïm tëëk.

⁵ Bɛ̈nydït, liep paannhial ku bä piny, jak kur nïïm agokï tol bɛ̈ɛ̈i.

⁶ Tuucë wilëdeŋ ku mac, ku thiäi kɔc ke aterdu, moc keek ë dhaŋ ku tɔ ke kɔt.

⁷ Bä piny tëdu nhial, ku miëëtë ya bei në pïïu thuth yiic, ku kony ɛn. Luäk ɛn ë biäk ë riɛl de alɛi,

⁸ kɔc cïï yith ee lueel ku yek tör ayï të cï kek kuëëŋ.

⁹ Nhialic, yïn bä kɛ̈t din ë piɛcë cak, ku kɛ̈t Yïn dit në thom ku aruöör.

¹⁰ Yïn ee meliik tɔ tiëm ku kony awundu Debid.

¹¹ Kony ɛn në kɔc rac ke aterdï, luäk ɛn ë biäk de riɛl de alɛi kɔc cïï yith ee lueel, ku yek tör ayï të cï kek kuëëŋ.

¹² Tɔ wɛ̈ɛ̈tkuɔ në dhuöökdenic tɔ ke cït wal ee cil ke ke ril. Tɔ duetkuɔ bï ciët mën ke luakic wën ee luak mɔ̈k nhial.

¹³ Tɔ arɔɔthkuɔ ye thiäŋ në kak ee luɔk ëbɛ̈n, ku bï thök amɛ̈lkuɔ aa dhiëth në aguum kathiëër de amithöök.

¹⁴ Tɔ ɣɔ̈kkuɔ ye dhiëth apiɛth ku bï ciën kɔ̈k ee thou, ku cïkï ee määr. Tɔ cïn dhiëëu ku jiɛthëpiɔ̈u ë kuɛɛrkuɔ yiic kedhie.

¹⁵ Thieithieei në kɔc bï athiɛɛi lööny në kegup, thieithieei në kɔc ye Nhialic Bɛ̈nydïïtden!