Diɛt 141 - JAM DE NHIALIC 2011

Lɔ̈ŋ Thëën

¹ Yïn aa cɔɔl Bɛ̈nydït, kony yɛn ënɔɔnë! Piŋ kë luɛɛl të caal ɛn Yïn.

² Nöm lɔ̈ŋdï cï wal ŋïr, ku cinkiën cä taar yiic cï miɔ̈c athɛ̈i.

³ Tääuwë raan ee tïït ë yathok, ye yɛn woi thok të jaam ɛn.

⁴ Gël ɛn në kɔ̈ɔ̈r de luɔi rac ku në luɔi cän bï mat wo kɔc rac ë luɔi racic. Në ya cïï mät wo keek ë dhuëŋken yiic.

⁵ Kɔc piɛth aduɛ̈ɛ̈rkï a dui ku nenkï yɛn në piath, ku yɛn cïï miɔ̈c de kɔc ee karɛc looi bï gam, në biäk ee yɛn cool ë läŋ në biäk de luɔidɛn rac.

⁶ Të cï ë bänyken cuat piny ë kur nïïm nhial, abï ë kɔc jɔ ŋic nɔn ye jamdï yic.

⁷ Cït man ye kuur cï cuat piny dhuɔɔŋ abïï lɔ thorthor, yen abï ciët yomkɛn bï lɔ thorthor në paan ë thuɔɔu thok.

⁸ Ku yïn ŋuɔɔt ke yï ŋääth Bɛ̈nydït Nhialicdï. Yɛn kɔɔr kuɔɔnydu, du yɛn tɔ thou.

⁹ Gël ɛn në wïn ë dɛ̈p cïk kek a deep, luäk ɛn ë bɔi de kɔc rac.

¹⁰ Tɔ kɔc rac tɔ lööny ë boikɛn cïk dɛɛp yiic, ku bä tëëk ke cïn kë yök ɛn.