Diɛt 139 - JAM DE NHIALIC 2011

Ŋïny de Nhialic ku Gël

¹ Bɛ̈nydït, Yïn cï ya them ku Yïn ŋic yɛn.

² Yïn ŋic këriëëc ya looi ëbɛ̈n. Yïn ŋic ka ya tak tëmec.

³ Yïn ë ya woi të luööi yɛn ayï të cän lɔ̈ŋ, yïn ŋic ka ya looi ëbɛ̈n.

⁴ Ayï të kën ɛn kɔn jam, Yïn ë kë bä lueel guɔ ŋic.

⁵ Yïn ee tɔ̈u ë yalɔ̈ɔ̈m në ɣään yiic kedhie, yïn ee yɛn gël ë riɛldïïtdu.

⁶ Ŋïny ŋic Yïn yɛn adït aläl.

⁷ Ee tënou duëër yɛn kat ke ya lɔ thïn ë Yïn? Ee tënou liiu Yïn thïn duëër yɛn lɔ?

⁸ Të la yɛn paannhial ke Yïn bä lɔ yök ëtɛ̈ɛ̈n, ku na la lɔ paan ë thuɔɔu yïn nu ëtɛ̈ɛ̈n.

⁹ Na kat ke ya lɔ të lɔ aköl amiäk ku nɔn la ciëën të lɔ aköl athɛ̈i,

¹⁰ Yïn bï nu ëtɛ̈ɛ̈n ke Yï wat yɛn, Yïn bï nu ëtɛ̈ɛ̈n ke Yï kony yɛn.

¹¹ Yïn duëër mɔ̈ɔ̈th thiëëc bï ya thiaan, ku nɔn ee ɣɛɛr bïï ya tuɔɔk cil ku tɔ ee wakɔ̈u,

¹² acakaa mɔ̈ɔ̈th acie cuɔl tëde yïn, ku wakɔ̈u aɣer cït akɔ̈l. Mɔ̈ɔ̈th ku wakɔ̈u akïtkï tëde yïn.

¹³ Yïn ë këriëëc ëbɛ̈n cak tëde yɛn, Yïn cï guöpdï cak ku tääuwë ë maar yäc.

¹⁴ Yïn bä leec në biäk bï ë kɔc aa riɔ̈ɔ̈c ë Yïn, ka ye looi kedhie ayek göök ku kake gäi. Aŋiɛc ke ëbɛ̈n në yapiɔ̈u.

¹⁵ Ɣɔn ciɛk ë yomkï, ku tɛ̈ɛ̈uwë keek ë maar yäc, wään diëët ɛn ëtɛ̈ɛ̈n ke cïï ŋic, aa ŋic nɔn nuö yɛn ëtɛ̈ɛ̈n.

¹⁶ Yïn cï ya tïŋ ke ya kënë kɔn dhiëëth. Akööl cï gäm ɛn acï ke gäär awerekdu yic, ke cïn raan cï yen kɔn gɔl.

¹⁷ Nhialic täŋdu adik arëët tëde yɛn, kuɛ̈nden ajuëc aläl!

¹⁸ Të kuɛɛn yɛn keek, ajuëckï awärkï liɛɛt. Na jat rɔt, ke Yï yɔ̈k ke Yï tɔ̈u we yɛn.

¹⁹ Nhialic, Yïn ŋääth nɔn bïï yïn kɔc rac nɔ̈k! Kɔc ke akuöörkuöör adï pɛ̈lkï yɛn!

²⁰ Ayek wël rac lueel ë biäkde, ku luelkï wël rac ë biäk de rinku,

²¹ Bɛ̈nydït aŋic nɔn maan ɛn kɔc man Yïn! Ku maan kɔc ee yïn rɛɛc!

²² Ayek kɔc ke aterdï aläl, ku amaan keek në män dïït agök.

²³ Nhialic, woi yapiɔ̈u ku them ɛn, ku ye täŋdï kɔɔric.

²⁴ Tïŋ na de kërɛɛc tɔ̈u ë yapiɔ̈u ku bä ya wat ë kueer ë pïïr athɛɛr yic.