Diɛt 138 - JAM DE NHIALIC 2011

Lɔ̈ŋ de Alɛɛc

¹ Yïn cä leec Bɛ̈nydït, ë piɔ̈ndï ëbɛ̈n, Yïn bä piɔɔny në yiëth nïïm.

² Yɛn bï yanɔm wɛl luaŋduön ɣeric, ku guöt yanɔm piny ku lɛɛc rinku në biäk de nhiëërduön agɔk ku piɔ̈nduön adöt, në biäk cï yïn rinku ku lööŋku nyuɔɔth nɔn nu kek ë käŋ nïïm ëbɛ̈n.

³ Yïn cï lɔ̈ŋdï piŋ wään caal yɛn Yïn, në riɛldu yïn cï yɛn bɛ̈n të ril ayadäŋ.

⁴ Bɛ̈nydït, meliik ke pinynɔm ëbɛ̈n abïk yïn leec, në biäk cï kek gutguutdu piŋ.

⁵ Abïk diɛt ke ka cï looi ket, ku ketkï diɛt ke dhuëëŋduön dït.

⁶ Na cakaa nɔn tɔ̈u Yïn nhial të mec, yïn ee kɔc tɔ̈u piny kony, ku kɔc ee röt lɛɛc acïkï duëër thiaan ë yïn.

⁷ Të cïï nuɛɛn ya gɛɛu cil, Yïn ee yɛn döt apiɛth. Yɛn cïï karɛc ee yök, Yïn ee kɔc ke aterdï göth jɔ̈ɔ̈ny ku gël yɛn ë riɛldu.

⁸ Yïn bï këriëëc cï yïn gutguut lueel ëbɛ̈n looi, Bɛ̈nydït nhiëërduön agɔk ee tɔ̈u athɛɛr! Thöl luɔiduön cï gɔl.