Diɛt 135 - JAM DE NHIALIC 2011

Din de Piɔ̈ny

¹ Lɛckï Bɛ̈nydït! Pianykï rin ke Bɛ̈nydït, wek awuut ke Bɛ̈nydït,

² ee kɔ̈ɔ̈c Luaŋdït, kɔc nu ɣön ë Nhialicda.

³ Lɛckï Bɛ̈nydït, në biäk piɛth ë Bɛ̈nydït, kɛ̈tkï diɛt rinke në luɔi diik en.

⁴ Bɛ̈nydït acï dhiën de Jakop lɔ̈c rɔt, ku lɔc kɔc ke Yithriɛl ke ke ye kɔcke.

⁵ Aŋiɛc Bɛ̈nydïïtda adït awär yiëth kɔ̈k ëbɛ̈n.

⁶ Ee kë kɔɔr në yepiɔ̈u looi ë pinynɔm ku paannhial në pïïu yiic ku në pïïu thäär piny tëthuth.

⁷ Ee luäät bɛ̈ɛ̈i ë piny thar ciëën, ku tuuc wil ë deŋ të tueny ë deŋ, ku liëp yom bei në ɣöötke yiic.

⁸ Acï kɛ̈i ëbɛ̈n nɔ̈k ë Rip kɛ̈i ke kɔc ku läi kedhie.

⁹ Acï göök ku kake gäi looi ëtɛ̈ɛ̈n dui yen melik kekë bänyke kedhie.

¹⁰ Acï juöör juëc riɔ̈ɔ̈k ku nɛ̈k meliik ril ëtör.

¹¹ Thiɣon, meliŋ de kɔc ke Amor ku Og meliŋ de Bacan, ku lɔ meliik ke Kanaan kedhie.

¹² Go Bɛ̈nydït pinyden gäm kɔcke, acï ke gäm kɔc ke Yithriɛl.

¹³ Bɛ̈nydït rinku abïk tɔ̈u aɣet athɛɛr, Nhialicda rɛm kedhie abïk Yïn aa tak.

¹⁴ Bɛ̈nydït abï kɔcke gël, ku abï piɔ̈u kok kekë awuutke.

¹⁵ Yiëth ke juöör kɔ̈k aye ke looi në ateek ku adhääp, aake looi ë kɔc në kecin.

¹⁶ Adekï thook ku acïkï ee jam ku adekï nyïïn ku acïkï ee daai.

¹⁷ Adekï yïth ku acïkï ee piŋ, ku acïkï wëi ee lëu aya.

¹⁸ Tɔ kɔc ee ke looi, ku kɔc ee keek ŋɔ̈ɔ̈th bï ciët yiëthkɛn cïk looi.

¹⁹ Yak Bɛ̈nydït thieei baai de Yithriɛl, Wek bäny ke kake Nhialic, yak Bɛ̈nydït thieei!

²⁰ Bɛ̈nydït abï kɔc ke Lebai thieei, wek kɔc ee yen lam, thiɛikï Bɛ̈nydït!

²¹ Yak Bɛ̈nydït thieei në Dhiɔn, paande në Jeruthalem. Lɛckï Bɛ̈nydït!