Diɛt 132 - JAM DE NHIALIC 2011

Lɛc de Luaŋdït

¹ Bɛ̈nydït du nɔm mär ë Debid ku nuɛɛn cï ke yök ëbɛ̈n.

² Tak gutguutde Bɛ̈nydït, kuëëŋ cï luöi yïn, yïn Awärjäŋ Nhialic de Jakop:

³ “Yɛn cïï bï lɔ baai ku cä lɔ ë biöökic,

⁴ yɛn cïï bï lɔ̈ŋ ku cä nin,

⁵ agut të bä yɛn tëde Bɛ̈nydït looi, ɣön de Awärjäŋ Nhialic de Jakop.”

⁶ Ɣɔn tɔ̈u wok në Bethleɣem wok cï athänduŋ de mät piŋ, goku lɔ yök në duum ke Jiriim yiic.

⁷ Goku lueel an, “lokku ɣön de Bɛ̈nydït, lok lɛmku në thööcde nɔm.”

⁸ Bä ɣöndu Bɛ̈nydït wekë athänduŋ de mät, kïn de riɛldu, ku rɛ̈ɛ̈rë ee tënë aɣet athɛɛr.

⁹ Tɔ bänykuön ke kake Nhialic loi kake Piathëpiɔ̈u ëceŋ, tɔ kɔcku cöt në miɛtëpiɔ̈u!

¹⁰ Yïn cï gutguut luöi awundu Debid, du Yïnyin wel wei në melikduön cï lɔc guöp.

¹¹ Yïn cï awunduön Debid luöi gutguut, gutguut cï bï dak nɔm ciëën: an, “Yɛn bï wën töŋdu tɔ ee melik, ku abï bääny muk në yïcök.

¹² Na gam mïthku mändï ku gamkï liööŋ cä gäm keek, wɛ̈ɛ̈tken aya abïk lɔ̈ɔ̈k aa meliik ëceŋ aya në yïcök.”

¹³ Bɛ̈nydït acï Dhiɔn lɔc akɔɔr bïï tɔ ee paande:

¹⁴ Acï lueel an, “Kënë ee paan bän nu thïn aɣet athɛɛr, kënë ee të bän bääny muk thïn.

¹⁵ Yɛn bï Dhiɔn thieei ë ka kɔɔr ëbɛ̈n, yɛn bï kɔckɛn kuanynyïïn tɔ kueth ë këcam.

¹⁶ Yɛn bï bänykɛn ke kakë Nhialic thieei në ka yek looi yiic ëbɛ̈n, ku kɔcke abïk aa cööt ku kɛ̈tkï në miɛtëpiɔ̈u.

¹⁷ Ëtɛ̈ɛ̈n yɛn bï wën töŋ de Debid tɔ ee melik dït, yɛn bï bääny de melikdiën cä lɔc döt ee tënë.

¹⁸ Yɛn bï kɔc ke aterde kuöm piny në ayäär, ku ciɛɛŋde abï kuɛth ku le ke dït.”