Diɛt 119 - JAM DE NHIALIC 2011

Löŋ de Bɛ̈nydït

¹ Thieithieei në kɔc ee cath në kuɛɛr cïn yiic gääk, ku yek ceŋ ke ke döt lööŋ ke Bɛ̈nydït.

² Thieithieei në kɔc ë lööŋke tiiŋ yic. Ku rïïukï keek në piɔ̈ɔ̈thken yiic ëbɛ̈n.

³ Acïn kërɛɛc yek looi, ayek cath ë kuɛɛr ke Bɛ̈nydït yic.

⁴ Bɛ̈nydït, Yïn cï wook gäm lööŋku ku acï lɛ̈k wook buk keek riëëu në piɔ̈ɔ̈thkuɔ ëbɛ̈n,

⁵ ku aŋääth nɔn bän aa raan adöt aguɔ lööŋku döt!

⁶ Na wɔi lööŋku apiɛth, ke yɛn cïï bï guöp yäär.

⁷ Të cän tän de piathëpiɔ̈ndu ŋic, Yïn bä lɛc nɔm në piɔ̈n lɔ wai.

⁸ Yɛn bï lööŋku döt, du yɛn bï nyääŋ piny!

Riëëu de Löŋ de Bɛ̈nydït

⁹ Duëër dhuök pïïrden tɔ lɔ wai adï? Ee në riëëu bï kek lööŋku aa riëëu.

¹⁰ Acä them në piɔ̈ndï ëbɛ̈n bä Yïn luöi, gël yɛn ke ya cïï lööŋku bï dhoŋ kɔ̈ɔ̈th.

¹¹ Yɛn cï lööŋku muk në yapiɔ̈u, ke ya cïï kërac bï luöi Yïn.

¹² Bɛ̈nydït, Yïn bä piɔɔny, wɛ̈ɛ̈të yɛn në kuɛɛrku.

¹³ Yɛn bï lööŋ cï gäm yɛn ëbɛ̈n, aa nyɔ̈ɔ̈kiic në röldït.

¹⁴ Yɛn ee piɔ̈u ayum bä lööŋku kuany cök awär luöi duëër ë raan kuɛth.

¹⁵ Yɛn bï lööŋku kueen yiic, ku thɛm wëëtdu.

¹⁶ Yɛn ee dhuëëŋ yök në lööŋku yiic,

Miɛtëpiɔ̈u në Lööŋ ke Bɛ̈nydït Yiic

¹⁷ Ye piath wekë yɛn, yɛn awundu, aguɔ pïïr ku bä wëëtdu aa riëëu.

¹⁸ Liep yanyin, aguɔ kake gäi tɔ̈u ë lööŋku yiic tïŋ.

¹⁹ Yɛn tɔ̈u ë pinynɔm ee tënë ë nïn liiakäŋ tei, du lööŋku thian ë yɛn.

²⁰ Yɛn ee reem piɔ̈u në këdu, akaar bä ŋic luɔi bï Yïn löŋdu guiir ë ceŋ.

²¹ Yïn ee kɔc ee röt lɛɛc jɔ̈ɔ̈ny, aciɛɛn abï nu ë kɔc cïï lööŋku ë riëëu yiëth.

²² Gämë yɛn nɔm lääu në lɛ̈ɛ̈tden kekë abiaan, në biäk cän lööŋku döt.

²³ Wɛ̈ɛ̈t meliik ayek kiɛɛr rac luöi yɛn, ku yɛn awundu, yɛn bï lööŋku kueen.

²⁴ Yɛn mit piɔ̈u wo wëëtdu ayek ya gäm täŋ piɛth.

Them bä Lööŋ ke Bɛ̈nydït Riëëu

²⁵ Yɛn cï tɔ̈c ke ya cï tiaam abuui yic, kony yɛn, cït man cïï yïn gutguut lueel.

²⁶ Yɛn cï awɛ̈ɛ̈c cä keek looi gam, ku Yïn cï yɛn piŋ thok. Ku wɛ̈ɛ̈të yɛn ë kuɛɛrku.

²⁷ Kony yɛn bä lööŋku yök yiic, ku yɛn bï wëëtduön gɛ̈iyë aa kueen.

²⁸ Jiɛthëpiɔ̈u ë ya tiaam, gämë yɛn riɛl, cït man cïï yïn gutguut lueel.

²⁹ Gël yɛn në lɔ ë kueer rac yic, ku në piathdu wëëtë yɛn në lööŋku.

³⁰ Ee kueer de piɔ̈n adöt yen acä lɔc, ku yɛn cï luɔi bïï ë lööŋku muk tïŋ.

³¹ Bɛ̈nydït yɛn cï lööŋku kuany cök, du yɛn bï tɔ yäär.

³² Abä them aläl bä lööŋku aa döt, në biäk bï Yïn yɛn gäm yöŋ de käŋ yiic dït.

Lɔ̈ŋ de Yöŋ de Käŋ Yiic

³³ Bɛ̈nydït, wɛ̈ɛ̈të yɛn në ka tɔ̈u ë lööŋku yiic, ku abä keek riëëu në akööl yiic ëbɛ̈n.

³⁴ Wɛ̈ɛ̈rë yɛn yic lööŋku, ku abä keek riëëu yic, abä keek muk ë yapiɔ̈u ëbɛ̈n.

³⁵ Tɔ yɛn riëëu cök ke lööŋku, në biäk ee yen ɛn tɔ mit piɔ̈u.

³⁶ Gämë yɛn kueer bän lööŋku riëëu awär kuɛthdï në kajuëc.

³⁷ Gël yɛn ë luɔi bän yapiɔ̈u wël kërac, tɔ rɔt piath wekë yɛn, cït man cïï yïn gutguut lueel.

³⁸ Döt gutguutduön cï lɛ̈k awundu, gutguut ye lɛ̈k kɔc ee Yïn riëëu.

³⁹ Kony yɛn në lɛ̈ɛ̈t ee yɛn tɔ riɔ̈ɔ̈c, në biäk ye guiëër de löŋdu këde gäi!

⁴⁰ Akaar bä lööŋku riëëu, gämë yɛn pïïr në piathëpiɔ̈ndu yic,

Ŋäth de Löŋ de Bɛ̈nydït

⁴¹ Tɔ nhiëërduön agɔk bɔ̈ tëde yɛn Bɛ̈nydït, ku tɔ kuɔɔny bɔ̈ cït man de gutguutdu,

⁴² Ku ëtɛ̈ɛ̈n yɛn bï jam de kɔc lɛ̈ɛ̈t yɛn bɛ̈ɛ̈r, në biäk ŋääth yɛn jamdu.

⁴³ Tɔ yɛn jam në yith në aköölnyïïn kedhie, në biäk tɔ̈u aŋäthdï në guiëër de löŋdu yic.

⁴⁴ Yɛn bï lööŋku riëëu ë ceŋ, aɣet athɛɛr.

⁴⁵ Ku yɛn bï pïïr në nɔm lääu, në biäk kaar yɛn bä wëëtdu riëëu.

⁴⁶ Yɛn bï lööŋku lɛ̈k meliik ku yɛn cïï guöp bï riɔ̈ɔ̈c.

⁴⁷ Yɛn ë miɛtëpiɔ̈u yök në riëëu de lööŋku, në biäk nhiaar yɛn keek.

⁴⁸ Yɛn nhiaar ku riëëu lööŋku, yɛn bï wëëtdu aa kueen yic.

Aŋäth në Lööŋ ke Bɛ̈nydït Yiic

⁴⁹ Tak yïnɔm ë gutguut cï lɛ̈k yɛn, yɛn awundu acï yɛn gäm aŋäth.

⁵⁰ Ayï wään nuan ɛn aaye ya duut piɔ̈u në biäk ye gutguutdu ya gäm pïïr.

⁵¹ Kɔc ee röt lɛɛc ayek ɛn läät, ku yɛn kën lööŋku pɔ̈l.

⁵² Yɛn ee lööŋkuön thɛɛr tak, ku ayek yɛn gäm duöt ë piɔ̈u Bɛ̈nydït.

⁵³ Të yan kɔc ee kërac looi tïŋ ke ke dhoŋ lööŋku kɔ̈ɔ̈th, yɛn ee gɔ̈th aläl.

⁵⁴ Të ŋuɔɔt yɛn ke ya pïïr ë pinynɔm yɛn cï diɛt cak në biäk de lööŋku.

⁵⁵ Bɛ̈nydït, yïn aa ya tak wakɔ̈u, ku tak yanɔm në biäk ë lööŋku.

⁵⁶ Yɛn ee miɛtëpiɔ̈u yök, në riëëu de lööŋku.

Dön ë Lööŋ ke Bɛ̈nydït

⁵⁷ Ee Yïn akaar yïtök Bɛ̈nydït, yɛn cï gutguut lueel bä lööŋku riëëu.

⁵⁸ Yïn cä thiëc në piɔ̈ndï ëbɛ̈n, bä piɔ̈u kok we yɛn, cït man cï yïn gutguut lueel!

⁵⁹ Yɛn ŋic täudï apiɛth, ku yɛn cï gutguut lueel bä wëëtdu kuany cök.

⁶⁰ Yɛn cïï bï gääu në luɔi bän lööŋku riëëu.

⁶¹ Kɔc ee kërac looi acïk a deep ë wïn de dɛ̈p, ku yɛn kën nɔm määr ë lööŋku.

⁶² Yɛn ee pääc ë wɛ̈ɛ̈ric wakɔ̈u, bä Yïn bɛ̈n leec në biäk de lööŋkuön ke piathëpiɔ̈u.

⁶³ Yɛn määth wokë kɔc ee Yïn luööi, kɔc ee lööŋku riëëu kedhie.

⁶⁴ Bɛ̈nydït, pinynɔm athiäŋ kekë nhiëërduön agɔk, wɛ̈ɛ̈të yɛn në lööŋku.

Kuën de Löŋ de Bɛ̈nydït

⁶⁵ Bɛ̈nydït, Yïn cï gutguut cï lueel muk, ku Yïn piɛth wekë yɛn, yɛn awundu.

⁶⁶ Gämë yɛn pɛlënɔm ku ŋïny de käŋ, në biäk yan lööŋku ŋɔ̈ɔ̈th.

⁶⁷ Të ŋoot Yïn ke Yï kën a dui, yɛn aaye awäc looi, ku ënɔɔnë yɛn rïïu jamdu.

⁶⁸ Piathdu adït, yïn dik! Wɛ̈ɛ̈të yɛn në lööŋku.

⁶⁹ Kɔc ee röt lɛɛc ayek lueth luɛɛl ë yaguöp, ku në piɔ̈ndï ëbɛ̈n yɛn ee wëëtdu riëëu.

⁷⁰ Ayek kɔc cïn ŋïny de käŋ, ku yɛn ee miɛtëpiɔ̈u yök në lööŋku yiic.

⁷¹ Luɔi cï yïn yɛn dui aa piɛth ke yɛn, në biäk cï yen yɛn tɔ ŋic lööŋku.

⁷² Löŋ cï gäm yɛn anyuth yɛn kajuëc awär adhääp ku atek ke pinynɔm.

Yic de Löŋ de Bɛ̈nydït

⁷³ Ee Yïn ë cak ɛn, ku kony yɛn gämë yɛn ŋïny de käŋ, aguɔ wëët ë lööŋku.

⁷⁴ Kɔc ee Yïn riëëu abïk piɔ̈ɔ̈th miɛt të le kek yɛn tïŋ, në biäk ŋääth yɛn gutguutdu.

⁷⁵ Bɛ̈nydït, aŋiɛc nɔn ye guiëër de löŋdu yic, ku yïn cï ya dui në biäk yïn piɔ̈u adöt.

⁷⁶ Tɔ nhiëërduön agɔk muk a piɔ̈u, cït man cïï yïn gutguut lɛ̈k yɛn, yɛn awundu.

⁷⁷ Kokëpiɔ̈u wekë yɛn, ku yɛn bï pïïr në biäk yan piɔ̈u miɛt në lööŋku.

⁷⁸ Tɔ kɔc ee röt lɛɛc yäär në luɔi cï kek a cäk thok ë lueth, ku në biäkdï, yɛn bï wëëtdu aa kueen yic.

⁷⁹ Tɔ kɔc ee Yïn riëëu bɔ̈ tëde yɛn, kɔc ŋic lööŋku kedhie.

⁸⁰ Tɔ yɛn rïïu lööŋku apiɛth ku bïï yɛn päl ayär cï ya tiaam.

Lɔ̈ŋ de Luääk

⁸¹ Yɛn cï bäp Bɛ̈nydït, ke ya kɔɔr kuɔɔnydu, Yɛn ŋäth jamdu.

⁸² Yɛn cï nyin ŋoot ke ya tït gutguut cï lueel, të yan thiëc an, “Ee nɛn yen bï Yïn yɛn kony?”

⁸³ Yɛn cïn kony cït dhïïm de mɔ̈u cï yic rɛɛt, ku yɛn kën nɔm määr në lööŋku.

⁸⁴ Bä jɔ tïït në run kadï? Ku ee nɛn yen bï Yïn kɔc yɔŋ ɛn luöi këtuc?

⁸⁵ Kɔc ee röt lɛɛc, cïï lööŋku ee riëëu, kɔc cï pɔ̈l wec deep kek yɛn.

⁸⁶ Lööŋku kedhie ayek yith, kony yɛn në kɔc ee ya cäk thok ku yɔŋkï yɛn!

⁸⁷ Acïk duëër tiam ë luɔi nɛ̈k kek yɛn, ku yɛn kën lööŋku dhɔɔt yiic.

⁸⁸ Në biäk de nhiëërduön agɔk ye wëikï tiit, aguɔ lööŋku riëëu kedhie.

Gäm nu ë lööŋ ke Bɛ̈nydït Yiic

⁸⁹ Bɛ̈nydït, jamdu abï tɔ̈u aɣet athɛɛr, ee tɔ̈u thɛɛr paannhial.

⁹⁰ Piɔ̈nduön adöt abï tɔ̈u ke rɛm bï bɛ̈n wadäŋ kedhie, Yïn cï piny tɔ kääc tëde, ku abï tɔ̈u ëtɛ̈ɛ̈n.

⁹¹ Käŋ kedhie atɔ̈ukï tëden agut cï ee köölë në biäk de kë cï lueel, në biäk ye kek awuutku kedhie.

⁹² Na cïï lööŋku ee kake miɛtëpiɔ̈ndï, ke yɛn duëër thou në guömdï yic.

⁹³ Yɛn cïï wëëtdu bï pɔ̈l ë liŋliŋ, në biäk cïï yïn yɛn tɔ pïïr në keek.

⁹⁴ Kony yɛn, yɛn ee mɛnhdu! Acä them bä lööŋku riëëu.

⁹⁵ Kɔc ee kërac looi atitkï bïk yɛn nɔ̈k, ku yɛn bï lööŋku aa kueen yiic.

⁹⁶ Aŋiɛc nɔn ye këriëëc ëbɛ̈n thök, ku lööŋku acïkï röt ee waar.

Nhiëër de Löŋ ë Bɛ̈nydït

⁹⁷ Yɛn nhiaar löŋdu arëët! Aya cool ë tak en en yic aköölnyïïn ëbɛ̈n.

⁹⁸ Löŋdu atɔ̈u kekë yɛn aköölnyïïn ëbɛ̈n ku ee yɛn tɔ pɛlënɔm awär kɔc ke aterdï.

⁹⁹ Yɛn ŋic kajuëc awär kɔc ë piööc yɛn, në biäk ee yɛn wëëtdu kueen yic.

¹⁰⁰ Yɛn cath wokë pɛlënɔm dït awär röördït cï dhiɔp, në biäk ee yɛn lööŋku riëëu.

¹⁰¹ Yɛn cï kueer ë luɔi de rac ëbɛ̈n pɔ̈l, në biäk kaar ɛn bä jamdu riëëu.

¹⁰² Yɛn kën wëëtdu dhɔɔt yic, në biäk ye Yïn Bɛ̈nydiën ee wëët ɛn.

¹⁰³ Të thiëëpë wëëtdu amit aläl amit awär miök de kiëc në yathok!

¹⁰⁴ Yɛn ë pɛlënɔm yök tëde lööŋku, yen amaan ɛn luɔi de kërac ëbɛ̈n!

Ɣɛɛr de Löŋ de Bɛ̈nydït

¹⁰⁵ Jamdu ee many alath ee ya wat ku ee ɣɛɛr de kueerdï yic.

¹⁰⁶ Yɛn bï gutguut cä lueel muk bä wëëtdu riëëu.

¹⁰⁷ Bɛ̈nydït, nuandï, atök thok aläl, tɔ yɛn pïïr cït man cïï yïn gutguut lueel.

¹⁰⁸ Bɛ̈nydït, gam lɔ̈ŋdiën de alɛɛc, ku wɛ̈ɛ̈të yɛn në lööŋku.

¹⁰⁹ Yɛn ee pïïrdï kuɔɔn ë ceŋ, ku yɛn kën nɔm määr ë löŋdu.

¹¹⁰ Kɔc rac acïk a deep wïn ë dɛ̈p, ku yɛn cï lööŋku riëëu.

¹¹¹ Lööŋku ayek kake pïïrdï aɣet athɛɛr, kek aye miɛtëpiɔ̈ndï.

¹¹² Acä tak ë yapiɔ̈u bä lööŋku riëëu agut kööl bä yɛn thou.

Kuɔɔny në löŋ de Bɛ̈nydïtic

¹¹³ Yɛn man kɔc cïï Yïn ë luööi taiwei, ku yɛn nhiaar löŋdu.

¹¹⁴ Yïn ee tëdiën ë thiaan ku ye köndï, yɛn cï aŋäthdï tääu në gutguutdu yic.

¹¹⁵ Jälkï ë yalɔ̈ɔ̈m, wek kɔc ee kërac looi. Yɛn bï lööŋ ke Nhialicdï riëëu.

¹¹⁶ Gämë yɛn riɛl, cït man cïï yïn gutguut lueel, ku yɛn bï pïïr, du yɛn tɔ bï bäp piɔ̈u në aŋäthdï yic!

¹¹⁷ Muk yɛn, ku yɛn bï poth, ku yɛn bï lööŋku aa döt aköölnyïïn kedhie.

¹¹⁸ Yïn ee raan reec lööŋku rɛɛc, kiɛɛrdɛn rɛɛc yek looi acïn naamde.

¹¹⁹ Yïn ee kɔc rac luööi cï dhuur nɔm, ku yɛn anhiaar wëëtdu.

¹²⁰ Yɛn ee riɔ̈ɔ̈c në biäkdu, yɛn cï yic thiäŋ wokë riɔ̈ɔ̈c, në biäk de guiëër ë löŋdu.

Reec de Löŋ de Bɛ̈nydït

¹²¹ Yɛn cï yic looi ku këpiɛth, du yɛn tɔ lööny ë kɔc ke aterdï cin!

¹²² Lueel gutguut nɔn bï Yïn awundu kony, ku du kɔc ee röt leec tɔ yɔŋ yɛn!

¹²³ Nyïïnkï acïk ŋoot ke ya woi kuɔɔnydu, ku në luɔi bïï ë gutguut de piathëpiɔ̈ndu tɔ ee yic.

¹²⁴ Luɔiyë awundu në nhiëërduön agɔk, ku wɛ̈ɛ̈të yɛn në lööŋku.

¹²⁵ Yɛn ë awundu, gämë yɛn ŋïny de käŋ, ke ya bï wëëtdu ŋic.

¹²⁶ Bɛ̈nydït, kaam bï yïn luui acï bɛ̈n, në biäk reec ë kɔc löŋdu.

¹²⁷ Yɛn nhiaar lööŋku awär adhääp, anhiaar awär adhäm läk.

¹²⁸ Yen akuany ɛn wëëtdu cök, yɛn man kuɛɛr rac ëbɛ̈n.

Kueer bï Löŋ de Bɛ̈nydït Riëëu

¹²⁹ Wëëtdu ëbɛ̈n ee këde gäi, aya keek riëëu ë yapiɔ̈u ëbɛ̈n.

¹³⁰ Wɛ̈ɛ̈r de wëëtdu yic ee ɣɛɛr bɛ̈ɛ̈i ku ee pɛlënɔm yiɛ̈n kɔc cïn kë ŋickï.

¹³¹ Yɛn ee yathok ŋaam, ke ya kɔɔr lööŋku.

¹³² Pɔ̈kë Yïnɔm yɛn ku kokëpiɔ̈u we yɛn, cït man ee Yïn ye luöi kɔc nhiaar Yïn.

¹³³ Cït man cïn gutguut lueel, muk ɛn du yɛn tɔ tiɛɛm ë kërac.

¹³⁴ Kony yɛn në kɔc yɔŋ yɛn, aguɔ lööŋku riëëu.

¹³⁵ Gämë awundu athiɛɛi de täudu ku wɛ̈ɛ̈të yɛn në lööŋku.

¹³⁶ Yɛn ee nyin dhiau ë pïïu cït man ë kiir, në biäk cïï kɔc lööŋku ee riëëu.

Yic de Löŋ de Bɛ̈nydït

¹³⁷ Bɛ̈nydït, Yïn agɔk, ku lööŋku kek aye yith.

¹³⁸ Lööŋ cï keek gam ayek kake piathëpiɔ̈u ku kake piɔ̈n adöt kedhie.

¹³⁹ Agönhdï adɛ̈p ë ya yäc cït mac, në biäk ye kɔc ke aterdï lööŋku dhɔɔt yiic.

¹⁴⁰ Gutguutdu ee yic! Anhiɛɛr awundu keek!

¹⁴¹ Yɛn cïn naamdï ku dhäl ɛn guöp, ku yɛn cïï wëëtdu ee dhɔɔtic.

¹⁴² Ku piathëpiɔ̈ndu abï tɔ̈u aɣet athɛɛr, ku löŋdu yen aye yic.

¹⁴³ Yɛn cï guöp thiäŋ wokë wël ku diɛɛr, ku lööŋku ayek ya gäm miɛtëpiɔ̈u.

¹⁴⁴ Wëlku kek aye yith ë ceŋ gämë yɛn ŋïny de käŋ, ke ya bï pïïr.

Lɔ̈ŋ de Luääk

¹⁴⁵ Yïn caal në piɔ̈ndï ëbɛ̈n, Bɛ̈nydït, piŋ këdï, ku yɛn bï lööŋku riëëu!

¹⁴⁶ Yïn cä cɔɔl, kony yɛn, ku yɛn bï lööŋku döt.

¹⁴⁷ Yïn cä cɔɔl bä yɛn kony ke akɔ̈l ë kën thok bɛ̈n, yɛn cï aŋäthdï tääu në gutguutduön cï lueel yic.

¹⁴⁸ Yɛn aa ruu ke ya yiɛ̈n wakɔ̈u, ke ya tak wëëtdu yic.

¹⁴⁹ Bɛ̈nydït, piŋ jamdï, në biäk ë nhiëërduön agɔk, nyoth kokdepiɔ̈ndu, ku döt wëikï!

¹⁵⁰ Kɔc rac ee yɛn yɔŋ acïk ɣëët tëthiɔ̈k, kɔc cïï lööŋku ee riëëu.

¹⁵¹ Ku Yïn thiɔ̈k ë yalɔ̈ɔ̈m Bɛ̈nydït, ku lööŋku kedhie ayek tɔ̈u tëden ë caŋɣɔn.

¹⁵² Yɛn cï piööc në wëëtdu ɣɔn thɛɛr, ku acï keek looi ke ke bï tɔ̈u aɣet athɛɛr.

Lɔ̈ŋ në Biäk de kuɔɔny

¹⁵³ Woi nuandï tei, ku kony yɛn, në biäk kɛ̈n ɛn löŋdu dhɔɔt yic.

¹⁵⁴ Gël yicdï, ku gämë yɛn nɔm lääu, kony yɛn, cït man cï yïn gutguut lueel.

¹⁵⁵ Kɔc ee kërac looi acïï keek bïï kony wëi, në biäk cïï kek lööŋku ee riëëu.

¹⁵⁶ Ku kokdepiɔ̈ndu, adït Bɛ̈nydït, nyuɔɔthë kokdepiɔ̈ndu ku kony yɛn!

¹⁵⁷ Yɛn de nɔm kɔc juëc ke ater, ku yɛn kën bäp në riëëu de lööŋku.

¹⁵⁸ Të yan kɔc cïn gäm tïŋ, yɛn ee piɔ̈u jiɛth, në biäk cïï kek lööŋku ee döt.

¹⁵⁹ Bɛ̈nydït, tïŋ nhiëër nhiaar ɛn wëëtdu, nhiëërduön agɔk, acïï rɔt ee waar, ka Yïn kony yɛn!

¹⁶⁰ Piɔ̈n de löŋdu yen aye yic, ku guiëër de piathëpiɔ̈ndu ëbɛ̈n ee tɔ̈u athɛɛr.

Dön de Löŋ de Bɛ̈nydït

¹⁶¹ Kɔc ril ëtör ayek yɛn mak baaŋ, ku yɛn riëëu löŋdu.

¹⁶² Yɛn mit piɔ̈u arëët në biäk de gutguutdu, yɛn mitpiɔ̈u cï raan cï wëu juëc kuany piny.

¹⁶³ Yɛn man jam rac ku tör ë lueth, ku yɛn nhiaar löŋdu.

¹⁶⁴ Yïn ya leec raandhorou aköölnyïïn në biäk de guiëërduön ë piathëpiɔ̈u.

¹⁶⁵ Kɔc nhiaar löŋdu adekï nɔm lääu, ku acïn kë duëër keek tɔ wiɛ̈ɛ̈k.

¹⁶⁶ Bɛ̈nydït, Yïn tiɛɛt bä yɛn kony, ku yɛn bï lööŋku looi.

¹⁶⁷ Yɛn ee wëëtdu riëëu, anhiaar keek ë yapiɔ̈u ëbɛ̈n.

¹⁶⁸ Yɛn ee lööŋku ku wëëtdu riëëu, Yïn ŋic këriëëc ya looi ëbɛ̈n.

Lɔ̈ŋ de Kuɔɔny

¹⁶⁹ Bɛ̈nydït, tɔ dhiën dhiëëu ɛn kuɔɔny ɣet tëde Yïn! Gämë yɛn ŋïny de käŋ, cït man cï yïn gutguut lueel.

¹⁷⁰ Piŋ lɔ̈ŋdï, ku kony yɛn wëi cït man cï yïn gutguut lueel!

¹⁷¹ Yïn bä aa leec aköölnyïïn, në biäk cï yïn a wɛ̈ɛ̈t në lööŋku.

¹⁷² Yɛn bï löŋdu kɛ̈t dit, në biäk ye lööŋku yith.

¹⁷³ Ye rɔt guiir ë ceŋ bä yɛn aa kony, në biäk kuany yɛn lööŋku cök.

¹⁷⁴ Yɛn ŋäth kuɔɔnydu Bɛ̈nydït! Yɛn ee miɛtëpiɔ̈u yök në löŋdu yic.

¹⁷⁵ Gämë yɛn pïïr, aguɔ Yïn aa leec, në wëëtdu kony yɛn.

¹⁷⁶ Yɛn cï nɔm mum cï thök cï määr, ka bä kɔɔr ɛn, yɛn awundu, në biäk kɛ̈n yɛn lööŋku dhɔɔt yiic.