Diɛt 116 - JAM DE NHIALIC 2011

Raan cï Kony ë Thuɔɔuwic Apiɔny Nhialic

¹ Yɛn nhiaar Bɛ̈nydït, në biäk ee Yen a piŋ thok, ee lɔ̈ŋdï piŋ.

² Ee ya piŋ thok të caal ɛn En akööl yiic ëbɛ̈n.

³ Wïïn ke thuɔɔu aake cï ya tuɔɔk cil, ku pɔ̈l ke paan ë thuɔɔu aake cï thiɔ̈k në yalɔ̈ɔ̈m, aguɔ thiäŋ wo riɔ̈ɔ̈c ku jiɛthëpiɔ̈u.

⁴ Na wën, ke ya cɔl Bɛ̈nydït an, “Yïn läŋ, Bɛ̈nydït, kony yɛn!”

⁵ Bɛ̈nydït ee piɔ̈u kok ku apiɛth, Nhialicda ee piɔ̈u kok.

⁶ Bɛ̈nydït ee kɔc kuanynyïïn gël, ɣɔn cän lööny ë riääkic, acï yɛn bɛ̈n kony.

⁷ Yɛn bï yapiɔ̈u päl piny ë määth, në biäk piɛth ë Bɛ̈nydït kekë yɛn.

⁸ Bɛ̈nydït acï ya kony në thuɔɔu, acï dhiëndï tɔ kääc ku gël yɛn ke ya cïï bïï tiaam.

⁹ Yɛn ee cath në Bɛ̈nydït nɔm, piny de kɔc pïïr.

¹⁰ Ku ya tɔ̈u ke ya muk gämdï, ayï të cän e lueel an, “Yɛn cï riääk liŋliŋ,”

¹¹ ayï të cän riɔ̈ɔ̈c ku luɛɛl an, “Acïn raan töŋ bï ŋɔ̈ɔ̈th.”

¹² Eeŋö bä gäm Bɛ̈nydït në biäk de kajuëc piɛth cï luöi yɛn?

¹³ Yɛn bï Bɛ̈nydït gäm miɔ̈c ë mɔ̈u, bä yɛn ke yen leec në kë cï yen a kony.

¹⁴ Në amatnɔm de kɔcke yiic ëbɛ̈n abä gäm kë cän gutguut lueel.

¹⁵ Bɛ̈nydït ee piɔ̈u dhiau aläl të cïï raan töŋdɛn nhiɛɛr thou!

¹⁶ Yɛn awundu Bɛ̈nydït, Yïn ya luöi, cït man cï maar ye looi. Yïn cï yɛn kony ë thuɔɔu.

¹⁷ Yïn bä gäm miɔ̈c de thieithieei ku gäm Yïn lɔ̈ŋdï.

¹⁸ Yɛn bï kuëëŋdï gäm Bɛ̈nydït në kɔcke nïïm kedhie,

¹⁹ ku në kuut de Luaŋdït nɔm, në Jeruthalem yic, Lɛckï Bɛ̈nydït!