Diɛt 106 - JAM DE NHIALIC 2011

Piath ë Bɛ̈nydït tëde Kɔcke

¹ Lɛckï Bɛ̈nydït! Gämkï Bɛ̈nydït lɛc, në biäk de piathde, nhiëërdɛn agɔk atɔ̈u athɛɛr.

² Eeŋa duëër kadït cï ke looi lueel? Eeŋa duëër ye ŋiëc lɛc nɔm arëët?

³ Thieithieei në kɔc ee yicde döt, kɔc ee piathëpiɔ̈u looi aköölnyïïn.

⁴ Kokëpiɔ̈u we yɛn, Bɛ̈nydït, të le Yïn kɔcku kony, mat ɛn wo keek të le Yïn keek luök.

⁵ Tɔ ya tïŋ kuɛth de kɔcku tɔ ya rɔm miɛtëpiɔ̈u wo jurdu ë tök, në miɛtëpiɔ̈u de lɛc ë kɔcku.

⁶ Wok cï wäc cït man ë kuarkuɔ, wok cï kërac looi ku ciɛthku në rɛ̈ɛ̈c yic.

⁷ Kuarkuɔ ɣɔn tɔ̈u kek ë Rip akënkï kagɛ̈iyë cï Nhialic ke looi yök yiic, acïk nïïm määr në ka juëc yen keek nyuöth nhiëërdɛn agɔk, gokï Awärjäŋ rɛɛc thok në Wɛ̈ɛ̈r thith yɔu.

⁸ Ku acï keek bɛ̈n kony, cït man ë gutguut cï looi, ago ke nyuöth riɛldɛn dït.

⁹ Acï Wɛ̈ɛ̈r thith yɔ̈ɔ̈k, ago yic ril wei, acï kɔcke bɛ̈n tɔ tëm piny ril, cït man ë jɔ̈ɔ̈r.

¹⁰ Acï keek luäk bei tëde kɔc man keek, acï keek luök tëde kɔc de kek ater.

¹¹ Ku pïïu acïk kɔc de kek ater mou, acïn raan töŋ cï bɛ̈n döŋ ë keyiic.

¹² Yen acïï kɔcke gutguut bɛ̈n gam, ku jɔkï ket leckï.

¹³ Ku ayek nïïm guɔ dap määr ë kë cï looi ku luikï ke ke cïï täŋde be tiit.

¹⁴ Aake cï piɔ̈ɔ̈th thiäŋ në karac juëc cïk looi në jɔ̈ɔ̈ric ku jɔkï Nhialic them,

¹⁵ go keek gäm ke kɔɔrkï, ku tuc keek jɔɔk tuc thook aläl.

¹⁶ Ku në jɔ̈ɔ̈ric ëtɛ̈ɛ̈n acïï tiɛɛl ke bɛ̈n dɔm në biäk ë Mothe, ku Aron, awuut ɣeriic ke Bɛ̈nydït.

¹⁷ Ago piny ë yic liep ku liek Dathan, ku kut Abiram nɔm piny kekë paande,

¹⁸ ku bɔ̈ mac piny në kɔc kuany kecök gup ku nyop ee kɔc rackë.

¹⁹ Acïk miɔɔr de adhääp cuëëc në Thinai, ku jɔkï ee yanhë lam,

²⁰ acïk dhuëëŋ de Nhialic waar në guöp de lɛ̈n ee nyuäth ë wal.

²¹ Acïk nïïm määr ë Nhialic wään cï ke kony në riɛldɛn dït wään ë Rip.

²² Ee kake gäi cït ŋö cï ke looi ëtɛ̈ɛ̈n! Ku na göök cï looi ë Wɛ̈ɛ̈r thith yɔu!

²³ Na wën cï ë Nhialic ye lueel nɔn bï yen kɔcke nɔ̈k, ago Mothe awundɛn cï lɔc Nhialic bɛ̈n jɔ̈ɔ̈ny, ago pɛ̈n luɔi bï yen ke nɔ̈k në agönhde.

²⁴ Gokï piny piɛth rɛɛc, në biäk kën kek gutguut ë Nhialic gam.

²⁵ Gokï rëër ë pɛɛnyken yiic ku jɔkï ŋun, ku cïkï jam de Bɛ̈nydït piŋ.

²⁶ Na wën, ke jɔ̈ɔ̈ny keek aläl nɔn bï yen keek tɔ thou ë jɔ̈ɔ̈r yic,

²⁷ ku bï kuatden thiäi ë juöör yiic, ku tɔ ke thou në wuöt kɔ̈k yiic.

²⁸ Na ɣɔn në Baal de Peyor, go kɔc ke Nhialic mɛt ë läm de Baal yic, ku camkï miɔ̈c cï gäm yiëth cï thou.

²⁹ Agokï Bɛ̈nydït tɔ göth në kë cïk looi, ago juän dïït tuc thok rɔ jɔt ë ke yiic.

³⁰ Go Pineɣath rɔt jɔt ku lui kɔc de gup awɛ̈ɛ̈c këtuc, go juäi kɔ̈ɔ̈c.

³¹ Yen ee kënë acï bɛ̈n cɔ̈l yen ke ee piathëpiɔ̈u gɔl ë remë leer ë rɛm bï bɛ̈n wadäŋ.

³² Të thiäk kekë nyin de Meriba kɔc acïk Bɛ̈nydït tɔ göth, ku acïk Mothe bɛ̈n tääu ë nuan yic ë biäkden.

³³ Acïk tɔ jeth piɔ̈u abï jam cuuth ke cïï be tak.

³⁴ Akënkï kɔc kën Nhialic gam nɔ̈k, cït man cï Bɛ̈nydït keek yɔ̈ɔ̈k bïk looi.

³⁵ Ku acïk bɛ̈n liääp ku thiakkï juöör, ku dɔmkï ciɛɛŋ de kɔc kuc Nhialic.

³⁶ Kɔc ke Nhialic acïk yiëth lam, ku acï keek thɛ̈l riääk.

³⁷ Ayek wɛ̈ɛ̈tken ku duetken gam ke ee miɔ̈c de yiëth ke Kanaan.

³⁸ Ayek riɛm de kɔc cïn gup awɛ̈ɛ̈c tɔ kuëër, riɛm de wɛ̈ɛ̈tken ku duetkɛn yek näk yiëth ke Kanaan, ago piny jɔ riääk ë baŋ de nääk ë kɔc.

³⁹ Keek acïk kegup tɔ rac ë biäk de luɔiden, ku cïnkï piɔ̈ɔ̈th adöt tëde Nhialic.

⁴⁰ Ëtɛ̈ɛ̈n Nhialic acï piɔ̈u bɛ̈n diu kekë kɔcke, ago kɔcke maan.

⁴¹ Acï keek päl ë riɛl juöör kuc Nhialic cin, ku jɔ kɔc ke aterden keek cieŋ.

⁴² Aye kɔc ke aterden keek yɔŋ, ku tɔkï keek ee kɔc ee ke luööi.

⁴³ Bɛ̈nydït ee kɔcke luök raan juëc, ku ayek ŋoot ke reeckï thok ku jɔkï lɔ mou ë kërac yic.

⁴⁴ Ku Nhialic ee ŋoot ke piŋ dhiënden ago piɔ̈u kok kekë nuanden.

⁴⁵ Në biäkden akën nɔm määr në mänden ke keek, ku looi në biäk de dït de nhiëërdɛn agɔk.

⁴⁶ Acï kɔc yɔŋ keek tɔ kok piɔ̈ɔ̈th në biäkden.

⁴⁷ Kony wook, Bɛ̈nydït Nhialinyda, ku bɛ̈ɛ̈iyë wook ciëën ë juöör yiic. Agoku piɔ̈ɔ̈th miɛt, ku buk rinkuön ɣeriic leec.

⁴⁸ Pianykï Bɛ̈nydït, Nhialiny de Yithriɛl, pianykï ënɔɔnë ku aɣet athɛɛr! Në lueel ë raan ëbɛ̈n, “Amiin!” Lɛckï Bɛ̈nydït!