Diɛt 105 - JAM DE NHIALIC 2011

Nhialic kekë Kɔcke

¹ Gäm ë Bɛ̈nydït lɛc, tɔ lɛcde tɔ piŋ, lɛ̈kë juöör ka cï looi.

² Kɛ̈të Bɛ̈nydït diɛt ke piɔ̈ny, luɛɛlë ka gɛ̈iyë cï keek looi.

³ Jakï piɔ̈ɔ̈th miɛt në rinkɛn ɣeriic, tɔ kɔc ee Yen lam mit piɔ̈ɔ̈th.

⁴ Ye Bɛ̈nydït kɔɔr kekë riɛlde, ku ye lam ë ceŋ.

⁵ Yak kagɛ̈iyë cï ke looi tak, göök, ku löŋ cï lueel,

⁶ wek kuat de Abraɣam, awunde, wɛ̈ɛ̈t ke Jakop, raan cï lɔc.

⁷ Bɛ̈nydït Yen aye Nhialicda, lööŋke kedhie ayek kake pinynɔm.

⁸ Abï mände muk aɣet athɛɛr, ku gutguutde abï tɔ̈u ke aguum ke rɛm bï lɔ̈ɔ̈k bɛ̈n.

⁹ Abï mändɛn cï looi kekë Abraɣam muk, ku lɔ gutguut kekë Yithaak.

¹⁰ Bɛ̈nydït acï mät looi kekë Jakop, män bï tɔ̈u aɣet athɛɛr.

¹¹ Acï luɛɛl an, “Yïn bä gäm piny de Kanaan ku abï aa këdu.”

¹² Kɔc ke Nhialic aake lik në kuën, alɛi nu piny de Kanaan.

¹³ Aake ye tai ke ke lɔ jurë ku lek jurë, ku lek ciɛɛŋë ku ciɛɛŋë.

¹⁴ Ku akën ë Nhialic keek bɛ̈n tɔ yɔŋ ë raan, go ke gël ë luɔi yen meliik jɔ̈ɔ̈ny.

¹⁵ “Duökï awuutkï cï lɔc jak, duökï tïtkï jak.”

¹⁶ Bɛ̈nydït acï cɔk tɔ löny paanden ku nyiɛɛi kacaamken ëbɛ̈n.

¹⁷ Ku acï raan tuɔɔc ë kenïïm tueŋ, Jothep, wään cïk ɣaac ke ye lïm.

¹⁸ Aa rɛk cök ë joth, ku nu wënh cï dhookic ë yeyeth.

¹⁹ Agut të bï kë wään cï lueel bɛ̈n aa yic. Ago jam de Bɛ̈nydït Yen nyuɔɔth nɔn de yen yic.

²⁰ Yen acï melik de Rip yen bɛ̈n tɔ lony, acï gäm nɔm lääu ë raan ë mac juöör ëbɛ̈n.

²¹ Ku tɛ̈ɛ̈u këriëëc de miricde ëbɛ̈n ë yeciin, ku looi ke ye bɛ̈ny de piny ëbɛ̈n,

²² acath ke riɛl tɔ̈u en ë bäny nïïm, ku wëët röördïtken në pɛlënɔm.

²³ Ago Jakop lɔ Rip ku lee rëër ee paanë.

²⁴ Go Bɛ̈nydït mïth juëc gäm kɔcke, ku tɔ keek tɔ ril awär kɔc de kek ater.

²⁵ Acï kɔc ke Rip tɔ man kɔcke, ku jɔ lïïmke kuöc cieŋ ku yɔŋ keek.

²⁶ Ago lïmdɛn Mothe tuööc, ku Aron, kɔckɛn cï lɔc.

²⁷ Agokï ke cïï Nhialic lueel looi, ku loikï kagɛ̈iyë ë Rip.

²⁸ Nhialic acï mɔ̈ɔ̈th tuöc ee paanë, ku kɔc ke Rip akënkï löŋde bɛ̈n riëëu.

²⁹ Acï pïïuken puk aye riɛm, ku nɛ̈k recken kedhie.

³⁰ Paanden acï aguek bɛ̈n thiɔ̈ɔ̈ŋ, agut ɣöndïït ë melik acï thiäŋ ë keek.

³¹ Nhialic acï jam, ago luaŋ piny pɛ̈t, ë ruöi ë baai yic ëbɛ̈n.

³² Ago amaŋdït kekë wilëdeŋ tuöc paanden, në nyin ë deŋ,

³³ acï tiimkɛn ke ŋaap ku enap riɔ̈ɔ̈k, ku dhoŋ tiimken piny kedhie.

³⁴ Ee jam, ago kɔyɔm bɛ̈n, aguum juëc ke kɔyɔm cie lëu në kuɛ̈n,

³⁵ acïk nyïïn ke wal cam kedhie pinyden, ku ciɛmkï rɛɛp ee luɔk ëbɛ̈n.

³⁶ Acï wɛ̈ɛ̈t kɛ̈ɛ̈i nɔ̈k në dhiëën ke Rip kedhie.

³⁷ Ku jɔ kɔc ke Yithriɛl tɔ jël, agokï ateek ku adhääp jɔt, ku dhiëën kedhie aake ril ku piɔlkï gup.

³⁸ Kɔc ke Rip aake riɔ̈c ë keek gokï piɔ̈ɔ̈th miɛt ë jälden.

³⁹ Nhialic ë luät tääu ë kenïïm, ku tɔ mac tɔ dɛ̈p wakɔ̈u bï keek meer.

⁴⁰ Acïk thiëëc në rïïŋ bïk cam, go keek tuöc dhuööl ë thɔ̈rɔ̈ɔ̈l, acï keek gäm këcam paannhial bï keek tɔ kueth.

⁴¹ Ku liep kur yiic, go pïïu dhuŋ bei, ku jɔkï wat ë jɔ̈ɔ̈r yic cït man ë kiir.

⁴² Aa tak gutguutdɛn ɣeric cï looi kekë awundɛn Abraɣam.

⁴³ Ago kɔckɛn cï lɔc wɛ̈t bei, agokï ket ë diɛt ku woukï në miɛtëpiɔ̈u.

⁴⁴ Ago keek gäm piny de juöör kɔ̈k, ku tɔ keek nöm duumken,

⁴⁵ Ago kɔcke lööŋke riëëu ku dötkï cök ke lööŋke kedhie. Lɛckï Bɛ̈nydït!