Diɛt 102 - JAM DE NHIALIC 2011

Lɔ̈ŋ de Dhuŋ cï Nuan

¹ Bɛ̈nydït, piŋ lɔ̈ŋdï, ku piŋ dhiëndiën kaar ɛn kuɔɔny tëde Yïn!

² Të täu ɛn ë nuanic, du Yïnɔm ee wɛl wei ë yɛn! Piŋ kë lɛ̈k Yïn, ku dap yɛn piŋ thok të caal ɛn Yïn!

³ Pïïrdï alɔ ke thök cït man ë tol, guöpdï adɛ̈p cït man ë mac.

⁴ Yɛn cï dhuɔŋ piny cït wal cï riɛl, aguɔ piɔ̈u ciɛ̈n këcam.

⁵ Ku ja teer ë röldït, acïn kë cï döŋ ë biöök yen cï nuɛt ë yom kɔ̈ɔ̈th.

⁶ Yɛn cït din roor nu ë jɔ̈ɔ̈ric, abä ciët agumut tɔ̈u paan cï riääk.

⁷ Ku ruöör ke ya yiɛ̈n, abä ciët din tɔ̈u ë ɣöt nɔm yetök.

⁸ Kɔc ke aterdï ayek cool ë ke lɛ̈ɛ̈t yɛn, kɔc ee ya dɔl guöp ayek rinkï tɔ ye këde aciɛɛn.

⁹ Yɛn ee ŋeth cam ke ye kuïn, ku pïïu ke yɛn nyin ayek liääp në pïïu ke dɛ̈k,

¹⁰ në biäk ë ŋeenydu ku agɔ̈th, Yïn cï ya jat nhial ku cuatë ya wei.

¹¹ Pïïrdï acï ciët atïm athɛ̈i, yɛn cït wal cï riɛl.

¹² Ku Yïn Bɛ̈nydït, Yïn ee melik aɣet athɛɛr, rɛm ëbɛ̈n abïk Yïn aa tak.

¹³ Yïn bï rɔt jɔt ku kokë piɔ̈u we Dhiɔn, akööl acïk bɛ̈n akööl bï Yïn piɔ̈u kok wekë yen, kööl rɔ̈ŋ kï ee kënë.

¹⁴ Awuutku anhiaarkï Jeruthalem, cakaa nɔn cïï ë yen riɔ̈ɔ̈k, ayek piɔ̈ɔ̈th kok në yen, cakaa nɔn cïï ë yen thuöör piny.

¹⁵ Juöör ke pinynɔm ëbɛ̈n abïk riɔ̈ɔ̈c në Bɛ̈nydït, meliik ke piny nɔm abïk riɔ̈ɔ̈c në riɛlde.

¹⁶ Rial të le Bɛ̈nydït Dhiɔn nyɔk ë yïk, abï dïtde nyuɔɔth.

¹⁷ Abï këde kɔckɛn cï päl wei piŋ, ku jɔ lɔ̈ŋden piŋ.

¹⁸ Gäärkï kë cïï Bɛ̈nydït looi piny në biäk de rem bï lɔ̈ɔ̈k bɛ̈n ciëën, ago kɔc ŋoot ke ke kënë kɔn dhiëëth ye leec.

¹⁹ Bɛ̈nydït ee piny woi tëdɛn ɣeric nu nhial, ee piny nɔm woi ke nu paannhial.

²⁰ Acï teer de kɔc cï mac piŋ go kɔc gäm nɔm lääu kɔc cï guiir an bïï ke nɔ̈k.

²¹ Yen abïï ë rin ke Bɛ̈nydït aa cɔɔl në Dhiɔn, ku abï aa lɛc nɔm ë Jeruthalem,

²² të lee juöör ku ciɛɛŋ guëër tëtök kedhie, ku lɛmkï Bɛ̈nydït.

²³ Bɛ̈nydït acï ya tɔ kɔ̈c guöp ke ya ŋoot ke ya koor, acï pïïrdï tɔ cek.

²⁴ Nhialic, du ya go jat wei ënɔɔnë ke ya kën guɔ dhiɔp. Bɛ̈nydït, päl ɛn aɣet athɛɛr,

²⁵ wään thɛɛr Yïn cï pinynɔm cak, ku loi paannhial në cinku.

²⁶ Abïk riäär kedhie, ku Yïn bï döŋ, abïk riääk cït man ë lupɔɔ. Ku abä ke rɛt cï lupɔɔ, ku abïk riäär taitai.

²⁷ Ku Yïn tɔ̈u ë täu cï rɔt ee waar, ku pïïrdu acie thök.

²⁸ Mïth ke awuutku, abïk rëër ë nɔm lääu, ku Yïn abï keek gël. Ku kuatden abïï ke kony.